Ondo bete du egitekoa

Kito. Zehaztuta daude Buruz Buruko Txapelketaren final-laurdenetako bi ligaxkak: A multzoan, Jokin Altuna, Jose Javier Zabaleta, Joseba Ezkurdia eta Dario Gomez ariko dira. B multzoan, berriz, Beñat Rezusta, Iñaki Artola, Unai Laso eta Erik Jaka. Datorren asteburu luzean jokatuko da aurreneko jardunaldia: ostiralean hasi eta astelehenean bukatuko da.

Jaka izan da sailkatu den azkena. Atzo Eibarko (Gipuzkoa) Astelenan Iker Irribarriari nagusitasunez irabazita sailkatu zen: 22-15. Asko zegoen irabazteko: ligaxka jokatzea; baina baita asko galtzeko ere: kanpoan geratzea. Horrek tentsio handia eragin zion partidari. Hori ondoen kudeatzen zuenak irabaziko zuen. Jakak egin zuen, eta hura gailendu zen.

Lizartzarrak ez zuen ikusgarri jokatu, baina ondo egin zituen egin beharreko guztiak. Batetik, min handia egin zuen sakearekin: sei tanto lortu zituen, gehienak hasieran, eta erabakigarriak izan ziren garaipena bideratzen hasteko (12-4). Bestetik, deseroso sentiarazi zuen Irribarria une oro. Aramarra lotuta aritu zen. Zerbait bada, jotzaile handia da, baina atzo ia ez zion etekinik atera dohain horri. Nekez gozatu zuen: airez, zertxobait, baina botez, batere ez. Eskuko minez egon da, eta horrek izango zuen zerikusirik.

Ezintasun horrek etsipena eragin zion, eta, ondorioz, presaz jokatzea ere bai. Hamar pilota huts egin zituen, eta hirutan egin zuen falta sakean. Horretan ere deseroso sentiarazi zuen Jakak. Haren botilero Jon Eskuderok agindu zion aurkaria sakatzera zihoanean hura urduritzen saiatzeko, eta emaitza oso ona izan zen. Seguru aritu zen Jaka —lau pilota bakarrik galdu zituen, eta sake batean egin zuen falta, partidako aurrenekoan—, eta ondo defentsan, eusten, batez ere Irribarriak partidaren erdian izan zuen susperraldian: 12-8 eta 14-10. Baina hortxe amaitu zen Aspekoaren gorakada.

Final-zortzirenak jokatuta, asteburuan ekingo diote final-laurdenetako ligaxkari: Rezustak eta Jakak jokatuko dute aurreneko partida, ostiralean, Bergaran (Gipuzkoa), 22:00etan (ETB1): larunbatean, Zabaleta eta Ezkurdia arituko dira Iruñean, Labriten (17:15, ETB1); igandean, berriz, Altuna III.a eta Dario izango dira aurrez aurre Bilbon (17:00, ETB1); eta astelehenean, Artolak eta Lasok neurtuko dituzte indarrak Zumaian (Gipuzkoa), 17:00etan.

Trinketeko finalak, prest

Trinketan, berriz, asteburuan argitu da zein lau bikotek jokatuko dituzten binakako bi finalak: Lehen Mailan, Peio Larralde eta Jon Saint Paul ariko dira Mattin Olzomendiren eta Battitta Ducassouren aurka, maiatzaren 1ean, Baionan; Bigarren Mailan, berriz, Laurent Bielle eta Andoni Iphar ariko dira Ekhi Ziarrustaren eta Inhar Ugarteren aurka, maiatzaren 2an, Donibane Garazin.