Asko dago jokoan

Gaur amaituko da buruz burukoren final-laurdenetako ligaxkako bigarren jardunaldia. Luze jo du: duela lau egun hasi zen, eta, Jokin Altunaren eta Joseba Ezkurdiaren artekoa bertan behera geratu zenez, ez da neurketarik jokatu larunbatetik.

Gaur ekingo diote berriro lehiari. Jose Javier Zabaleta eta Dario Gomez ariko dira elkarren aurka, Legazpin (Gipuzkoa), 17:30ean. Asko dago jokoan: finalerdietarako sailkatzeko aukerari eustea. Ezkurdia sailkatuta dago jada, jokatu dituen bi partidak irabazi baititu. Zabaletak eta Dariok, berriz, galdu egin dute jokatu duten partida bakarra. Beraz, galtzailea ia aukerarik gabe geratuko da. Iaz elkarren aurka jokatu zuten, final-laurdenetan, eta Zabaletak nagusitasunez irabazi zuen: 22-5.

Zabaletak irabazteak hiru ondorio izango lituzke: Dario aukerarik gabe geratuko litzateke; Ezkurdiak lehen postua ziurtatuko luke; eta Zabaletak eta Altunak bigarren postua lukete jokoan azkeneko jardunaldian.

Dariok irabaziz gero, berriz, Zabaletak oso zail luke sailkatzea, eta aurrelariak aukera izango luke. Horretarako, Ezkurdiari irabazi beharko lioke azken jardunaldian. Bederatzian utziko balu, lehena litzateke, eta Ezkurdia, bigarren; hark nahikoa luke hamar tanto egitea. Dariok galtzeak, berriz, Altuna III.ari egingo lioke mesede, eta, Zabaletari irabaziz gero, finalerdiak jokatuko lituzke.