Eraberrituta dator

Pixkanaka-pixkanaka, bidea egiten ari da euskal futbol selekzioa. Hamabigarren aldiz jokatuko du gaur, Mendizorrotzako estadioan (19:00, ETB1). Txileren kontra ariko da oraingoan.

Eraberritu egin dute euskal selekzioa. Batetik, hautatzailea aldatu dute. Juanjo Arregik Iñigo Juaristi ordezkatu du, azken horrek Alavesen ardura hartu berri baitu. Bitxia da, aurretik Juaristik ordezkatu baitzuen Arregi selekzioan. Haren ondoan, arrastoa utzitako bi futbolari ariko dira: Ainhoa Tirapu eta Sandra Ramajo.

Bestetik, gaur jokatuko duten futbolari gehienak lehen aldiz ariko dira selekzioarekin; hemezortzitik hamalau. Hauek ariko dira lehen aldiz: Nerea Eizagirre, Iraia Iparragirre, Amaiur Sarriegi, Cecilia Marcos (Reala), Nerea Nevado, Maite Zubieta (Athletic), Irati Urruzola, Maitane Zalba, Patricia Zugasti, Maitane Vilariño (Osasuna), Marta San Adrian, Ane Miren Martinez de la Hidalga (Alaves), Jone Ibañez eta Arene Altonaga (Eibar). Leire Bañosek (Levante), Amaia Peñak (Athletic), Itziar Gastearenak (Granada) eta Ane Etxezarretak (Reala) bakarrik dakite zer den selekzio nagusiaren elastikoa janztea.

Txapeldunen Liga jokatu behar zuten euskal jokalariak ez daude deialdian: Irene Paredes (Bartzelona), Maite Oroz, Nahikari Garcia (Real Madril) eta Damaris Egurrola (Olympique Lyon).

Txilek, berriz, gora egin du: 38. lekuan dago FIFAren zerrendan. Amerika kopa guztiak jokatu ditu, eta bi aldiz izan da txapeldunorde. 2019an, Munduko Kopa jokatu zuen, eta, iaz, Olinpiar Jokoetan aritu zen. Ez batean, ez bestean, ez zuen gainditu ligaxka.