Etenaldiak suspertu du

Ederra izan zen Bidasoak eta Sportingek duela hiru urte Artalekun jokatu zuten Txapeldunen Ligako partida, eta ederra izan zen ere atzo bi talde horiek Europako Ligan jokatu zutena. Oraingoan, ordea, festa biribila izan zen, etxekoek irabazi baitzuten, hiru golen aldeaz: 30-27. Horri esker, aurrerapausoa eman dute final-laurdenetan aritzeko. Aurretik dira, baina ez dago ezer erabakita; astebete barru zehaztuko da dena, Lisboan.

Bidasoak gaizki ekin zion lehiari. Erasoan, kostata sartzen zituen golak. Sportingek, ordea, aise topatzen zituen zuloak etxekoen 5-1eko defentsan. Nagusi ziren bisitariak: 4-6. Ordurako jokalari bat baino gehiago joana zen lurrera, irrist eginda. Hezetasunak kalte egin zion zoruari, eta hori ikusita, epaileek partida eten zuten. Ia 25 minutuz egon zen etenda, hezetasunak behera egin arte.

Etenak mesede egin zien etxekoei. Gora egin zuten, batez ere, defentsan, 6-0aren alde eginda. Sportingek jada ez zituen horren aise sartzen golak. Defentsan hobetuta, erasoan hobetu zuten ere irundarrek. Horri esker, berdindu egin zen lehia, baita emaitza ere. Atsedenaldian, gol bakar baten aldea zuten bisitariek: 11-12.

Bigarren etenak,ordea, ez zuen ezer eten, eta Bidasoak oso serio jarraitu zuen. Lehen aldiz, aurretik jarri zen (12-11). Lan bikain horrek Artaleku hauspotu zuen, eta jokalarien eta zaleen arteko batasunak sekulako bultzada eman zion taldeari. Hala, pixkanaka, aldea handituz joan zen (19-14).

Baina jokalari oso onak ditu Sportingek, eta gutxi behar dute min egiteko. Hala, gol bakarrera jarri ziren. Baina etxekoek ondo eutsi zioten aldeari, garaipenari eta itxaropenari.

Bera Bera, Guardesen pistan

Bera Berak, berriz, gaur jokatuko du Espainiako Ligako lehia, Guardesen pistan (20:45). Donostiako taldeak irabazi egin nahi du, urte erdiren ostean galdu izanak utzitako aho zapore gazia gozatzeko.

Imanol Alvarezen taldeak adi ibili beharko du, Guardes behetik gora baitator: irabazi egin ditu azkeneko bost partidak. Gainera, beste inon baino arriskutsuagoa da etxean. Bera Berak nahikoa du berdintzea ligako lehen postua ziurtatzeko; gero, txapeldun izateko kanporaketak jokatuko ditu.