Ezusteko porrota
Oraindik garaipenik lortu gabe zegoen Aguas Santas Europako Ligako ligaxkan, baina Bidasoak ezin izan zuen punturik eskuratu atzo, eta 28-25 galdu zuen Portugalen. Puntu nahikoa bildu dute oraingoz irundarrek, baina tentu handiz ibili beharko dute hurrengo jardunaldietan beste irristadarik ez egiteko.
Partida parekatua jokatu zuten atzo Aguas Santas Milanezak eta Bidasoak. Multzoko azken sailkatua lehen garaipenaren bila zelairatu zen zaleen aurrean, eta hurrengo fasera sailkatzeko dituzten aukeretan sinetsita, partida osoa egin zuten. Bidasoak, ordea, ez zuen asmatu. Lehen zatian aurretik izan ziren arren, deseroso aritu ziren une oro. 45. minututik aurrera lehen errentak lortu zituen etxeko taldeak, eta puntuen beharrak bultzatuta, ez zioten Bidasoari ohikoa duen jokoa egiten utzi.
Porrotaren ostean zazpi punturekin dago Bidasoa sailkapenean, eta lau puntura ditu Motor eta Aguas Santas, bosgarren eta seigarren sailkatuak, hurrenez hurren.
Bera Bera, gaur, Elxen
Bera Berak, berriz, Espainiako Ligako hamalaugarren jardunaldiko partida jokatuko du gaur Elxen (Herrialde Katalanak), 20:00etan. Donostiako taldeak bolada bikaina harrapatu du: ligako estreinan, etxean, Malagaren aurka galdu eta gero, irabazi egin ditu ondoren jokatu dituen neurketa guztiak; hamabi, hain zuzen ere. Horri esker, zazpi punturen aldea du bigarren sailkatuarekiko.
Bolada eder horri eutsi nahi dio gaur. Partida oso bihurria da, Elx sasoi betean baitago: irabazi egin ditu azken bost partidak. Donostian, nagusitasunez irabazi zuen Imanol Alvarezek entrenatutako taldeak (32-17), baina etxean aurkari arriskutsua da Elx.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
