Ilusioa eta zalantzak

Hilabete igaro da Espainiako Kopako finalerdien zozketa egin zenetik, eta urruti zirudien eguna bertan da jada. Bihar jokatuko dute Osasunak eta Athleticek joaneko partida Sadarren, eta bi taldeak oso egoera desberdinetan iritsiko dira egun handira; Osasunak Sanchez Pizjuanen irabazi zuen igandean, eta ohikoak ez diren hainbat jokalari zelairatu zituen Jagoba Arrasatek, biharko neurketarako jokalariak gordetzeko. Ezin hobeto atera zitzaion apustua, Ernesto Valverderi ez bezala. Athleticeko prestatzaileak denbora asko jokatzen duten jokalariak zelairatu zituen San Mamesen, eta ezustean galdu zuen Gironaren aurka etxean. Bi gol sartu zituen Athleticek bere atean, eta itxura kaskarra erakutsi zuen zaleen aurrean.

Hala ere, emaitza ez zen izan arratsaldeko albiste txarrena zuri-gorrientzat. Jokalari askok min hartu zuten, eta ez dira bihar Sadarren izango. Lesioek, gainera, ez daukate itxura onik; Unai Simonek orpazurdan hartu zuen min, eta Nico Williamsek eta Raul Garciak belauna eta sorbalda bihurritu zituzten, hurrenez hurren. Yeray Alvarezek eta Jon Morcillok ere min hartu zuten, eta Iñigo Martinez eta Ander Herrera ez daude jokatzeko prest.

Williamsen hutsunea izan daiteke nabarmenena. Jokalari gazteak urrats handiak egin ditu azken urtean, eta taldeko jokalari garrantzitsuenetako bat da gaur egun. Oraindik Sadarren jokatzeko aukerak ditu, baina gaur egun hori amets bat da errealitatea baino gehiago.

Iruñeko karriketan, ordea, ilusioa da nagusi. Hemezortzi urteren ostean itzuli da Osasuna Kopako finalerdietara, eta Sadarrek beste gau eder batekin gozatzeko aukera izango du. Lepo beteko dira harmailak kanporaketako lehen partida ikusteko. Igandera arte garaipenik lortu gabe zegoen Osasuna ligako azken bost neurketetan, baina Sevillan eskuratutako garaipenarekin mamuak uxatu ditu. Ruben Peña da gorritxoen artean min hartuta dagoen bakarra; beste guztiak egun handirako prest ditu Arrasatek.