Lisboan biribildu behar
Handia egin zuen Bidasoak iragan asteartean Europako Ligan. Lisboako Sporting hartu zuen mendean, 30-33. Portugalgo ligako liderrak dira zuri-berdeak, eta ez dute partida bakar bat bera ere galdu. Bidasoak gogotik egin zuen lan, eta Jacobo Cuetararen taldea gailendu egin zitzaien zaleen aupada baliatuta. Lehia, ordea, ez da amaitu. Gaur jokatuko dute itzulerako partida, Lisboan (20:45, DAZN). «Konfiantzaz eta ilusioz» daudela dio prestatzaileak.
Artalekun irabaztea beti da lan zaila bisitariarentzat, eta Sportingek ederki ikasi zuen hori. Gainera, balioa eman behar zaio garaipenari, bi taldek soilik lortu baitzuten final-zortzirenetan etxean irabaztea. Bidasotarrek lan bikaina egin zuten defentsan, eta Harbaouik ederki egin zituen atepean egin beharrekoak. Erasoan, Azkue izan zen etxekoen argi izpia, beste behin, eta Aginagalde nagusi izan zen sei metroetan. Cuetararen iritziz, aste batzuk badira «gustura jokatzen» ari direla, eta «joko ona eginda», gainera.
Hala ere, joanekoan, partidatik atera gabe aritu ziren bisitariak. Costa anaiek hartu zuten erantzukizuna, eta, ohi bezain ondo jokatzen badute, Bidasoak lan zaila izango du gaur. Franciscok zortzi gol sartu zituen, eta Martimek, berriz, zazpi. Gaurko neurketari begira, Cuetarak taldearen kontzentrazioan jarri du arreta: «Hiru golen aldea txikia da. Baina partzial on batek kanporaketa irabazten lagunduko liguke. 60 minutuz kontzentratuta egon behar dugu horretarako».
Gorka Nietok adierazi du hurrengo fasean sartzeko «ilusio handiarekin» joan direla, baina badakite neurketa zaila izango dela: «Artalekun partida ona jokatu genuen, baina, haien zaleen aurrean, hobeto jokatzen dute, eta zailagoa izango da». Hala ere, «hurrengo fasean sartzea» dute xede bidasotarrek.
Gaiak
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
