Heldu da izarren ordua

Bi hilabeteko etenaren ostean iritsi dira Txapeldunen Ligako kanporaketak. Lehiaketako hamasei talde indartsuenak ekainaren 10ean Istanbuleko (Turkia) Atatürk Olinpiar estadiora heltzeko lehian arituko dira. Baina bertara iristeko egin beharreko bidea ez da makala izango. PSG-Bayern Munich eta Milan-Tottenham arituko dira gaur (21:00, Movistar).

Horrelako lehiaketa gogor bat irabazi nahi dutenek onenei irabazi behar izaten dietela esan ohi da, baina zozketetan zortea alde edukitzea ere garrantzitsua da. Ez da hala izan Bayern Munichentzat eta PSGrentzat. Ustez garaikurra lortzeko faboritoetako bi dira, eta lehen kanporaketan neurtu beharko dituzte indarrak. Parisen ariko dira gaur, eta Munichen (Alemania) jokatuko dute bueltakoa.

Neurketa handia espero da, baina, hala ere, bi taldeek zenbait jokalari garrantzitsu gabe jokatuko dute. Frantziako taldean Verratti, Renato Sanches eta Mukiele ez dira ariko, min hartuta baitaude. Messik eta Mbappek ez dituzte Frantziako Ligako azken partidak jokatu, baina jokatzeko aukerak dauzkate. Alemaniako taldearen egoera ez da hobea. Neuer, Mane, Lucas Hernandez, Mazraoui eta Gravenberch ez baitira ariko. Hortaz, ikusi beharko da zein prestatzailek aterako dion etekin handiagoa aulkiari.

Eguneko beste neurketa ere zirrara handikoa izango da. Stefano Pioli eta Antonio Conte, Milaneko eta Tottenhameko prestatzaileak hurrenez hurren, italiarrak dira, eta hainbat aldiz jokatu dute elkarren aurka; azkenekoz, Milango derbian, Conte Interreko entrenatzaile zelarik. Bi taldeen jokatzeko erak ere antzekoak dira. Hiru erdiko atzelarirekin aritzen dira biak, eta gora egiten duten bi hegaleko erabiltzen dituzte. Gaurko neurketan, Maignan eta Lloris —atezain titularrak— ez dira ariko, min hartuta baitaude biak.

Milanentzat neurketa berezia izango da, 2013-2014az geroztik lehen aldiz itzuliko baitira Txapeldunen Ligako final-zortzirenak San Sirora. Londresko taldea, berriz, 2019ko finalean izan zen, baina azken bi urteetan Europako Ligan aritu da.