Asun Fernandez Garaialdek adierazi du gizarteko sektore "ahulena" susmopean jarri nahi duela UPNk: "Gizarteko sektore ahulenen eta baztertuen gainean zalantza zabaldu nahi du". Fernandez Garaialderen arabera, Nafarroan ez da haurren babes eta sustapenerako legea betetzen, "besteak beste, errenta eskatzeko jarritako mugengatik".
Bikendi Bareak gobernuaren "sentsibilitate falta" salatu du, Vanity Fair aldizkarian Yolanda Barcinak egindako adierazpenen harira: "Dieta hirukoitzak jasotzea goraipatu eta biharamunean gizarteratzeko errenta jasotzen duten pertsonei iruzurra leporatzeak argi uzten du zein den gobernu honen morala".
UPNren ustelkeria kasuak eta "mesede tratuak" gogoratu ditu EH Bilduko parlamentariak, eta gaineratu du "etengabeko iruzurra UPNren inguruan" dagoela. Nafarroako Gobernua baliabide publikoen erabilpenarekin "kezkatuta" badago, "etxetik has dadila" lanean dei egin dio. "UPNk egin behar duena da gizarteratzeko errenten legea aldatu, Nafarroako familia bat bera ere ez dadin gelditu bere oinarrizko beharrak betetzeko baliabiderik gabe".
