Irungo harrera sarean zebilela ezagutu zuen Amets Arzallusek Ibrahima Balde, eta haren kontakizunarekin osatu zuen bere lehen liburua, 2019an: Miñan. Dena dela, bertsolari gisa da Arzallus bereziki ezaguna. Gazterik hasi zen plazetan kantari, eta baita txapelketetan ere: 16 urterekin irabazi zuen Nafarroako bertsolari txapela. Euskal Herriko Bertsolari Txapelketa nagusian finalista izan da lau aldiz, eta txapela lortu zuen 2013an. Anitzetan kantatu dio migranteen arazoari. Kazetaria da ikasketaz, eta hainbat kolaborazio egin izan ditu prentsan. Gaur egun Saran bizi da (Lapurdi).
