Araba Garoñarik Gabe taldearen aburuz zentral nuklearraren itxierak ez du atzera bueltarik, eta berandu datorren arren, gizartearentzako berri “pozgarria” da. Plataformaren arabera, Espainiako Gobernuak ez luke zalantza hedatu behar segurtasun nuklearra bezalako gai garrantzitsu baten inguruan, hiru aldiz egin baitu atzera zentralaren auzian.
Garoña ez dela soilik arrazoi ekonomikoengatik itxiko uste du; “energia eredu baten krisialdiaren adierazle da”. Orain, zentrala eraisteko neurriak hartzeko ordua dela iritzi dio. Plataformaren ustez, eraisketa egiteko segurtasun neurriak Iberdrola eta Endesak -Nuclenor enpresaren jabeak- ordaindu behar dituzte, orain arte Garoñaren kontura eskuratu dituzten irabaziekin.
