Bilboko Aste Nagusian gogoan izan dituzte poliziak Filtron (Uruguai) hildako Fernando Morroni eta Roberto Facal, hilketa izan eta hemezortzi urtera. 1994ko abuztuaren 24an, gose greba egiten ari ziren hiru euskal errefuxiaturi babesa azaltzen ari ziren hainbat lagun, Filtroko ospitalearen atarian. Polizia oldartu zitzaien, eta tiroz hil zituen Morroni eta Facal. Askapena nazioarteko elkartasun erakundeak omenaldi berezia egin zien bart eta justizia eskatu zuten.
"Abuztuaren 24a betirako geratuko da memoria kolektiboan eta Uruguaiko eta Euskal Herriko militante internazionalisten oroitzapenetan", adierazi zuten Askapenakoek.
