Espainiako Auziegi Nazionaleko Fiskaltzak Frantziako Poliziak herenegun Cognacen atxilotutako Luis Enrike Garate estraditatzeko eskatuko du. Fiskaltzaren arabera, 1984an eta 1986an ETAk egin zituen hiru erasorekin zerikusia izan zuen Garatek, eta horretan oinarritu du eskaera. Zehazki, 1984an Durangoko (Bizkaia) Guardia Zibilaren kuartelaren kontra lehergailuekin egin zuten atentatuan, eta 1986an Espainiako Armadako koronel Jose Maria Picatosteren hilketan zein urte berean Luzio Aginagalde enpresaburuaren bahiketan parte hartu izana egoten dio Auzitegi Nazionalak Garateri.
Aitzitik, Auzitegi Nazionaleko Fiskaltzak ez du Garaterekin batera atxilotutako Ibon Elorrietaren eta gaur atzemandako Jon Kepa Preciadoren eta Jon Gonzalezen estradiziorik eskatuko. Izan ere, hiru lagun horiei leporatzen dizkieten delituak 1993ko azaroaren 1az geroztik egindakoak dira, eta, ondorioz, martxoaren 16an euroordena indarrean sartzen denean, estradizio eskaerarik gabe, hirurak zuzenean Espainiara eramateko eska dezake Fiskaltzak.
Atxiloketak
Garate estraditatzeko eskatuko du Espainiako Auzitegi Nazionalak
Gainerako hiru atxilotuei euroordena aplikatu zain egongo da
Iruzkinak
Ez dago iruzkinik
Ordenatu
