Michael Jackson hil dela jakin denetik Erresuma Batuan haren diskoen salmentak izugarri igo dira gaur.Uneotan musikariaren hamalau lanak Amazon.co.uk Internet dendako hogei salduenen artean daude. Off the Wall lehen bakarkako laneko Don't stop´til you get enouhg eta She's out of my life abestiak daude aipaturiko webguneko zerrendako buruan.
Interneten mugimendu handia
Interneten ere eragina izan du Jacksonen heriotzak. Sarean mugimendu handia nabaritu da azken orduetan. Heriotzari buruzko informazio bila jo dute askok Google bilatzailera eta, esaterako, bere heriotzaren informazioa eskuratzeko 57.000 kontsulta egin dira. Beste askok, aldiz, hari eskainitako mezuak idatzi dituzte Twitterren. Hamar ordu baino gutxiagotan 30.000 dolumin mezu inguru zenbatu dituzte foroetan, blogetan eta sare sozialetan.
Youtuben ere musikaria omendu nahi izan dute eta haren omenezko bideo kanal bat sortu du. Bestalde, musikariaren webguneak bisita ugari izan du gaur, ohi baino 48 aldiz gehiago.
Londresko kontzertuetarako sarreren inguruan zalantza
Uda honetan Michael Jacksonek Londresen 50 kontzertu eman behar zituen eta orain milaka pertsona zain daude erosita dituzten sarreren diruarekin zer gertatuko den.
AEG Live emanaldien sustatzaileak jakinarazi duenez, gaur emango dute sarreren diru itzulketaren berri.
Londresen inoiz ez dira sarrerak kasu honetan bezain azkar saldu. Kalkulatzen denez, 750.000 pertsonek erosi zituzten euren sarrerak ofizialki. Antolatzaileek aditzera eman dutenez, iragan martxoan sarrerak salgai jarri zirenean hamaika segundoro sarrera bat saldu zen, 657 minutuko eta 40.000 orduko.
Musikariaren diskoen salmentek izugarri egin dute gora Erresuma Batuan gaur
Iruzkinak
Ez dago iruzkinik
Ordenatu
