Olatz Beobide

Donostiako Parte Zaharrean sortu zen Beobide, Antzoki Zaharretik gertu. Hala du egungo etxea ere, eta handik heldu da bizi-bizi antzokira. Antzerti Arte Dramatikoko eskolan egin zituen interpretazioan lehen urratsak, eta «dena sortzen ari zen garaia» gertutik bizitzea egokitu zitzaion 1980ko eta 1990eko hamarkadetan. Lan asko egindakoa da ETBren garai oparoetan: Bi eta Bat, Babel, A ze parea, Jaun ta jabe eta Benta berri telesailetan aritu zen aktore, besteak beste, eta Goenkale-ko zuzendari ere izan zen zazpi urtez. «Hor profesio handi bat sortu zen, eta jende horri guztiari ez zaio babesik eman gero», dio, penaz. Aktore izan ez denetan, aktoreak zuzendu ditu, eta gero eta gehiago maite du hori. Urrian, Izotza apurtzen duen ertza estreinatuko dute, Antsoainen (Nafarroa), eta Gutuberrak websaila ere abiatzear dute. Lana falta bada, ez da etxean geratuko: «Ez badator, sortuko dugu guk, orain arte bezala».