Gure estiloaren eta auzo-lotsaren artean

Koinatu lisboarrak gonbidatuta izan ginen San Mamesen lehengo ostegunean. Partida, beraz, 2.500 Sportingzaleen artean ikusi genuen. Hasi aurretik, Lisboan izandako giro bikainak pentsarazi zigun Ertzaintzak iragarritako hedatzeak ez zuela zerikusirik gerta zitekeenarekin, Schalkeren egunean gertatutakoarekin baino. Alegia, norbere burua zuritzea eta egun hartan jazotakoen ardura inori egoztea. San Mamesen sartzean egiaztatu genituen usteok. Lehenik, gazte zein adineko, oinutsik sartzera derrigortu gintuzten; bigarrenik, tribunako korridorean dozenaka ertzain esperoan, zer gerta ere; eta hirugarrenik, korner batetik bestera futbol-zelaiaren ikustea eragozten zuen xare trinkoa. Hego-Beheko Harmailak sabaia gain-gainean duelarik, kaiola batean geundelako sentsazio itogarria izan genuen partida osoan. Kontuan hartuta sarrerek prezio bera zutela han eta hemen, alde izugarria. Estilo kontua, itxura batean.