Urriaren 11n jai Bizkaian

Aurten ospatu da, lehen aldiz, Euskadiren eguna, urriaren 25ean. Urteak dira izan dela ospakizun horretarako asmoa alderdi politiko jakin batzuen aldetik, baina ez, ordea, beste batzuen aldetik. Gauza nabaria da jai honek ez duela inolako zentzurik herritar askorentzat.

Esandakoaren azalpena dugu Euskadi denaren errealitateaz eta, batez ere, burujabetzarako bidean dituen ahalmenez, herritarren iritzien arteko batasunik eza. Berez, bidezkoa da. Bizkaitarren kasuan badago, urrian bertan, jai izateko beste aukera ezin hobe bat: urriaren 11. Izan ere, egun horretan ospatzen da Bizkaiko Patroia den Begoñako Amatxuren jaia, horren lekuko dugula Begoñako basilikaren inguruan urterik urte biltzen den jendetza. Eta jendetza horrek, beste herritar askorekin batera, bai ospatzen duela jai hori, ofiziala ez den arren. Herritarren artean batasunik sortu ez eta ekarpen praktikorik ez duen jai baten aurrean, bizkaitarrok, bere magalpean hartzen gaituen Amatxuren jaia ospatzeko aukera dugu. Horrek bai lekarkigukeela guztioi bakea eta poza.