Larunbat arratsaldean hasi ziren Fernando Osa euskal mendizalearen gorpuari autopsia egiten, Fiambalako erietxean. Herri horretara jaitsi zuten gorpua erreskate taldeek. Auzitegi medikuek ondorioztatu dute garaiera gaitzak eragindako biriketako edema baten ondorioz hil zela Osa.
Ondo bidean, heldu den astean espero dute hilotza Donostiara ailegatzea. Salbamenduaren zain zegoela zendu zen Osa, ostegunean. Bi egun zeramatzan ondoezik.
Bestalde, Argentinako hedabide ugarik argitaratu dute Catamarka probintziako Babes Zibileko zuzendariak dimisioa eman duela, Osaren erreskate lanetan hutsuneak izan zirelakoan.