Japoniako Gobernuak nazioarteko koalizioari emaniko babesa salatzeko, bi japoniar bahitu ditu Estatu Islamikoak, sarean zabaldu duen bideoan jakinarazi duenez. 72 orduko epean Japoniako Gobernuak 200 milioi dolar ordaindu ezean hil egingo dituztela esan dute.
Berri agentzien arabera, Haruna Yukawa eta Kenji Goto dira bahituak, azken hori kazetaria. Gatazkan dauden herrietan hainbat lan egin du, besteak beste, Iraken.
Oraindik bideoaren benetakotasuna baieztatzeko dago, baina Japoniako Gobernuaren eledun Yoshihide Sugak adierazi du ez dutela amore emango "terrorismoaren aurrean", eta ez dutela xantaia egitea onartuko. Auzia bideratzeko, Japoniako lehen ministro Shinzo Abek bertan behera utzi du Jerusalemera egitekoa zuen bidaia.