Bat-batean sortzen diren kantuak

Euskal Herrian aspaldidanik datorren tradizioa da bertsolaritzarena. Baina leku gehiagotan ere badute antzeko kantu inprobisatuak sortzeko joera: verseadoreak daude Kanaria uharteetan (Espainia), dengbej-ak Kurdistanen, glosadoreak Herrialde Katalanetan, reguefeiroak Galizian, cantadoriak Sardinian, repentistak Kuban, trovadoreak Mexikon... Adierazpide horien arteko ezagutza sustatzeko, Europa bat-batean Kantu Inprobisatuen Nazioarteko Topaketa abiatu dute Mintzola Ahozko Lantegiak eta Donostia 2016k. Euskal Herriko Unibertsitateko Udako Ikastaroetan gauzatuko da topaketa hori, baina, horren harira, beste hainbat jarduera antolatu dituzte gai beraren inguruan.

Larunbatetik aurrera, bertsolariek eta Kurdistango, Sardiniako eta Herrialde Katalanetako inprobisatzaileek girotze saioak egingo dituzte hainbat lekutan: larunbatean, Bilboko Azkuna Zentroan, 12:00etan; igandean, Hernaniko Biteri kultur etxean (Gipuzkoa), 19:00etan; datorren asteartean, apirilak 19, Donostiako Ignacio Maria Barriola Zentroan, 19:00etan; asteazkenean, apirilak 20, Iruñeko Zentral aretoan, 19:00etan; ostegunean, apirilak 21, Markina-Xemeingo kontzejupean (Bizkaia), 19:00etan; ostiralean, apirilak 22, Uztaritzeko Lapurdi Gelan (Lapurdi), 20:00etan; eta, larunbatean, apirilak 23, Aramaioko kultur etxean (Araba), 19:00etan.

Udan egingo dute egitasmoko jarduerarik nagusiena, uztailaren 11tik 16ra bitartean, Donostian. Goizez, jardunaldi akademikoak egingo dituzte Miramar jauregian: hitzaldiak eta mahai inguruak antolatu dituzte, eta nazioarteko adituek kantu inprobisatuari buruzko ikerketak eta gogoetak plazaratuko dituzte. Horrez gain, filmak eta argazki erakusketak ere prestatu dituzte. Zabalik dago izena emateko epea, uztailaren 6ra bitartean, www. uik.eus atarian; aste osorako edo egun jakinetarako eman daiteke izena.

Arratsaldeetan, berriz, bat-bateko saioak egingo dituzte Donostiako hainbat gunetan, — bat Oñatin (Gipuzkoa) izango da—. Orotara, sei ikuskizun izango dira, eta Euskal Herrikoez gain, hainbat herrialdetako inprobisatzaileek parte hartuko dute: Kubakoek, Mexikokoek, Herrialde Katalanetakoek, Galeskoek, Austriakoek eta Ziprekoek.