POLITIKA

Ezker abertzalearen talde disidente bat eratu dute

Askatasunaren Bidean batzarra aurkeztuko dute datorren larunbatean euskal preso eta iheslari ohi batzuek, Bilbon.

Berria -

2016ko maiatzak 14 10:47

Joan den urtarrilean, euskal preso eta iheslari ohi batzuk euren artean biltzen hasi ziren, ezker abertzalearen estrategia berriaz «kezka» dutelako, eta, BERRIAk jakin duenez, gaur zortzi Askatasunaren Bidean batzarra aurkeztuko dute, Bilbon, prentsaurreko baten bidez. Haien arabera, egun 60 -100 lagun daude taldean. «Errepresaliatu ohi izateak ez gaitu militante ohi bihurtzen», dio haien dokumentu batek.

2009ko azaroaren 14a mugarritzat jo dute: ezker abertzaleko hainbat kide esanguratsuk estrategia berria hasteko borondatea agertu zuten orduan, Altsasun, eta Askatasunaren Bidea eratu dutenek iritzi diote harrezkero «borrokaren despolitizazio saiakera bat» gertatu dela. «Aldaketa hau ezker abertzaleko frakzio erreformista batek egindako jokaldia izan da. Eta ez da soilik borroka armatuaren amaierara mugatu», diote disidenteek. «Krisi larrira eraman dute Euskal Nazio Askapenerako Mugimendua, sakon ahulduz eta indargabetuz, eta sisteman integratuz». Haien aburuz, hautu hura hartzeko ez zen «erabaki kolektiborik» izan.

«Esentzia historikoari» eusteko, batzar gisa funtzionatzen dute, eta adierazpen bat plazaratuko dute Bilbon. Agiria hainbat preso eta iheslari ohiri bidaltzen ari direla jakinarazi dute. «Sei urte beranduago gabiltza, baina ekin diogu bide bati». Gerora «herritar batasun berri baten proiektu politiko bat» sortzeko asmoa daukate.

«Borrokaren duintasunari eutsi» nahi diote. «Borrokaren beharraz eta borroka ideologikoaz hitz egiten dugu, ez borroka tresnez». Haien gutun baten arabera, bileretan ez da «borroka armatua berrartzea proposatu». «Errepresaliatuen» alde ariko direla ere badiote. «Etsaiaren xantaien aurrean amore ez emateagatik inor ez da bide bazterrean botata geldituko».

Iragarri dute harremana daukatela AEM Amnistiaren Aldeko eta Errepresioaren Kontrako Mugimenduarekin edota Eusko Ekintzarekin. «Abian prozesuaren ondorioz ere su txikiak pizten ari dira, eta lotura eman nahi diegu». Sortuk «ezker abertzaletik kanpo» kokatu izan du AEM. Askatasunaren Bidean-ek uste du Sortuk ez duela «disidentzia jasaten».

Goizeko buletina

BERRIAren papereko edizioaren gai nagusiak biltzen ditu egunero (astelehenetan salbu). Goizean goiz iristen da zure posta elektronikora.

Albiste gehiago

Mirentxin gidarietako boluntarioek gidatzen dituzte furgonetak. ©NAGORE ARIN
Azken porturaino

AZKEN PORTURAINO

Maddi Ane Txoperena Iribarren

Euskal presoak bisitatzera joateko, milaka kilometro egin behar izaten dituzte haien senide eta lagunek. Andaluziako Puerto de Santamariako espetxeetara egindako bidaia baten kronika da hau.
Sare Herritarrak atzo Donostiako Kontxa hondartzan eginiko mosaikoa. ©SARE

Olatu bat konponbidearen itsasertzera

Jon O. Urain

Sarek deituta, 600 lagunez osatutako mosaiko bat eratu dute Donostian. Espetxe politika aldatzeko eskatu dute
 ©JUAN CARLOS RUIZ / FOKU

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna