Kolonbiako bake prozesua

Bake prozesua amaitzear dira Kolonbia eta FARC

Gaur iragarriko dute ofizialki bake negoziazioen amaiera. Puntu nagusiak adostu dituzten arren, oraindik badira zenbait hutsune argitzeke. 52 urte iraun duen gatazka armatuaren amaiera ekarriko du hitzarmenak. Hura sinatzen denetik eta 180 eguneko epean armak utzi beharko dituzte FARCeko gerrillariek.

Negoziatzaile taldea  bart, Habanan. @IVANMARQUEZFARC
arantxa elizegi egilegor
2016ko abuztuaren 24a
09:04
Entzun

Iragarpen ofiziala datozen orduetan egingo dute, baina dagoeneko zabaldu da sare sozialetan. FARCeko negoziatzaile taldeko kide Timoleon Jimenezek jakinarazi du:

Izan ere, 52 urteko gatazka luzearen ostean eta lau urtez negoziatzen aritu eta gero, Kolonbiako Gobernuaren eta FARCen arteko bake elkarrizketak amaitzear daude Habanan. Bi aldeek aitortu dute oraindik hutsune txikiak geratzen direla argitzeko, baina puntu nagusiak —lurrak, droga trafikoa, biktimak, justizia eta armagabetzea— itxiak dituzte. "52 urteko gatazka armatuaren ostean, gurea izango da FARCik eta haien aurkako gerrarik gabe bizi ahal izango den lehen belaunaldia", nabarmendu du Claudia Nayibe senatariak.

Gaur zehaztuko dute noiz sinatuko duten bi aldeek akordioa. Egun horretatik hasita, gerrillak 180 eguneko tartea izango du arma guztiak emateko. Prozesua NBEko nazioarteko bitartekari talde batek egiaztatuko du. Dena den, behin betiko akordioa ez da indarrean sartuko baldin eta herriak erreferendumean baietza ematen ez badio.

Kolonbiako Memoria Historikoaren Zentro Nazionalak egindako Aski da! Kolonbia: gerra eta duintasun memoriak txostenaren arabera, gatazka armatuak 218.000 hildako, 25.000 desagertu eta 10 milioi desplazatu utzi ditu 1958az geroztik. "Erailketa selektiboen" bidez hildakoak 173.000 dira, gehienak eskuin muturreko talde paramilitarren eskuetan.

Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.