Arantxa Urretabizkaia kazetari eta idazlearen Bidean ikasia (1993-2016) obra berriak Hondarribiko alardea du abiapuntua: "Liburu honen helburua da gatazkan ikasi dudana besteentzako baliagarria izatea". Pamiela argitaletxeak kaleratu du liburua.
Alardearen inguruan izandako desadostasunak nabarmendu ditu Donostian egindako agerraldian: "Desadostasun baten aurrean, gure jokaera nagusia da iritzi desberdina duena etsai bilakatzea. Adostasunaren bertuteak ikasi ditut, desadostasunei esker".
Hogei urte pasatu ondoren erabaki du alardeari buruz idaztea, urte horiek "ardoa likore bilakatzeko" behar izan dituelako: "Orain aurkitu dut kontakizunaren forma eta liburua argitaratzeko kemena", azaldu du haren obra berriaren aurkezpenean. Argi utzi nahi izan du liburua ez dela historialari baten edo kazetari baten lana, literatura baizik.
Azken urteetan bizi izandakoari esker, Urretabizkaia konturatu da merezi duela konponbidea bilatzea eta ezinbestekoa dela beldurra gainditzea.
