200 nobedade inguru aurkeztuko ditu EHUk Durangoko Azokan. Horien artean, Basker. 1960ko hamarkadako euskal kulturari buruzko suediar dokumentalak; "harribitxia", Jon Zarate Euskara Arloko errektoreordearen esanetan. 1960ko hamarkadan, Suediako SVT telebista kateak euskal kulturari buruzko bi dokumental grabatu zituen.
Basker eta Bondei i Baskerland dokumentalak ahaztuak egon dira orain arte. Eubak dokumentalen deskribapen zehatza osatzeaz aparte, egileei buruzko informazioa, egileek Euskal Herrian bertako gidariekin batera eginiko ibilbidea deskribatu du, eta horrekin batean, filmen analisia eta dokumental bien eragin eta garrantziaren ebaluazioa. EHUk azaldu duenez, "balio historiko eta etnografiko berezia" dute dokumentalek, euskal kulturak azken hamarkadetan izandako "aldaketa sakonak agerian" uzten baitituzte: erreportari suediarrek gai ugari landu zituzten, baina folkloreak, hau da, musika eta dantza tradizionalaren adierazpideak piztu zuen batez ere euren jakin-mina".
Gaur, gainera, Euskararen Egunaren inguruko ekitaldien barruan, EHUren hiru campusetan ikusi ahalko da, 13:00etan. Estreinaldia izango da Euskal Herrian. Eta abenduaren 5ean, Durangoko Azokan bertan aurkeztuko dute, 16:00etan, Areto Nagusian.