IKURRINA
Lau hamarkada iruditerian
40 urte dira Realaren eta Athleticen arteko derbi batean Jose Angel Iribarrek eta Inaxio Kortabarriak ikurrina atera zutenetik.
1976ko abenduaren 5a. Francisco Franco Espainiako diktadorea urtebete lehenago hila, eta Erreforma Politikorako Legea onartu berri Espainiako Gorteetan. Aldarrikapen eta mobilizazio sozial handiko urteak, besteak beste hamarkada luzez ezkutuan izandakoak berriro plazaratzekoak.
1976ko abenduaren 5ean jokatu zuten Atotxan Realak eta Athleticek euskal derbia. Espainiako Ligako 13. jardunaldia zen, eta artean legez kanpokoa zen Ikurrina Hego Euskal Herrian. Legez kanpokoa, eta Frankismo garaian, jazarria. Egun horretan, ordea, historiarako irudia utzi zuten bi taldeek. Inaxio Kortabarria eta Jose Angel Iribar, bi taldeetako kapitainak, eskuan ikurrina zeramatela irten ziren Atotxako zelaira. Atzean, bi taldeetako hamaikakoak, eta harmailetan, txalo zaparrada. Gaur dira 40 urte irudi hartatik.
Irudiaren erdian, ikurrinak estalita, Josean De La Hoz Uranga ageri da. Haren hankak. Realeko jokalaria zen, eta gerora azaldu zuenez, harena eta beste lagun batzuena izan zen ideia. Haren arrebak josi zuen Getarian, eta partidaren egunean bertan eraman zuten Getariatik Donostiara. De la Hoz bera eta Kortabarria joan ziren Athleticekoengana, partida baino une batzuk lehenago, ikurrinarekin zelairatzea proposatzera. Bi taldeetako jokalariek aho batez onartu zuten keinua, eta hala egin zuten. Eta Sanchez Rios epaile andaluziarrak aktan idatzi zuen gertatutakoa. 1979an Araba, Bizkai eta Gipuzkoako estatutua onartzearekin legeztatu zuten.
Horrela azaldu zuen duela hiru urte De la Hoz Urangak ETBn, duela hiru urte:
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
