Lanasek 97 urte dauzka, eta kolpistek gogor jazarritako familia bateko kidea da. Tasio Erkizia, berriz, basatiki torturatu zuten 1975ean. Gaur egun 73 urte ditu. Frankoren diktaduraren biktimen familiek jarritako salaketa baten harira hasi zen Servini Frankismoko krimenak ikertzen, eta erregua bidali zuen Servinik Gernika-Lumoko epaitegira, Lanasi deklarazioa har ziezaion.
Frankismoaren Aurkako Argentinako Kereilaren Euskal Plataformak deituta, elkarrateratzea egin dute, Gernikako epaitegi atarian, Lanasi babesa adierazi eta krimen frankisten zigorgabetasuna salatzeko. Abenduaren 21ean ere elkarretaratzea egitera deitu du, Bilboko auzitegi atarian, Tasio Erkiziak deklaratu bitartean.
Busturialdeko Hitza-k zabaldu duenez, epaitegian "dena ondo" joan dela aitortu du Lanasek, eta "lasai" deklaratu duela: "Hori baino txarragoak pasatzera ohituta gaude". Esan du "guztia gertatu zen legez"azaldu duela eta kontatzeko zuen guztia azaltzen utzi diotela. Gaurko deklarazioa "garrantzitsua" izan da harentzat, berak eta bere familiak sufritu behar izan dutena "itzela" izan delako; "sinestezina".
