Albistea entzun

Euskal presoak

Majarenas aske uzteko eskatu du kartzelan ama izandako preso ohien talde batek

Valentziako ospitaleko arta intentsiboetako gunean jarraitzen du haren alabak, hobera egin badu ere. Euskal presoen kolektiboan, lau ume daude espetxean euren amekin. Bideoa: Araitz Zubimendi eta Maitane Sagastume espetxean ama izandako preso ohien lekukotza.

Jokin Sagarzazu -

2017ko urtarrilak 25

Haurraren osasunarengatik eta presoak zigorra “bete” duelako, Sara Majarenas aske uzteko eskatu du Espainiako eta Frantziako espetxeetan ama izandako preso ohien talde batek. Bere aitaren erasoa jasan zuen euskal presoaren alabak urtarrilaren 15ean, baimen batekin kalean zela, eta ordutik jarraitzen du Valentziako La Fe ospitalean (Herrialde Katalanak).

Haurraren egoerak hobera egin badu ere, arta intentsiboetako gunean dago oraindik. Eskatu dute ospitaletik ateratzean ama aske uzteko eta alabarekin batera etxera itzultzeko. Majarenas Picassenten dago preso, etxetik, Donostiatik 600 kilometrora.

Agerraldian gogoratu dutenez, duela bi urte bete zituen Majarenasek Espainiako Justiziak ezarritako zigorraren hiru laurdenak; horregatik, “aske” egon beharko lukeela diote. Orduan, bost hilabete zituen alabak.

Martxoan, 3 urte egingo ditu haurrak eta, legeak hala zehazten duenez, ezingo da denbora gehiago egon bere amarekin kartzelan. Bere osatze fisikoa eta psikologikoa ahalik eta hoberena izan dadin, amarekin egon behar duela azpimarratu dute.

Euren esperientzietan oinarrituta, preso ohiek nabarmendu dute amarengandik banatzeko unea izan ohi dela unerik “delikatuena eta konplexuena”; banaketak “eragin sakonak” izaten dituela haurrengan eta amengan.

Azaldu dute amen eta haurren arteko lotura “berezia” bada Majarenasen kasuan are funtsezkoagoa dela elkarrekin egotea, haurraren osatze fisiko zein psikologikorako “ezinbestekoa” delako ama ondoan izatea. “Ingresatu zutenean, medikuek berek eskatu zioten kartzelari Sara [Majarenas] umearengana ahalik eta gehien eraman zezaten, oso ondo erantzuten ari baitzen amaren estimuluen aurrean”, azaldu dute.

Preso ohien taldeak babes osoa agertu diote Majarenasi eta haren familiari. “Zurekin gaude eta egongo gara aurrerantzean egin beharreko bidean”.

Haurrak jasandako erasoa “patriarkatuaren isla eta ondorio zuzena” dela azpimarratu dute, eta, horrekin loturik, aurreko astean Burlatan hildako Blanca Esther Marquesen hilketa ere salatu dute.

Kartzelan ama izatea

Agerraldian hainbat datu eman dituzte: euskal presoen kasuan, denera, 40 ume jaio eta bizi izan direla Espainiako eta Frantziako espetxeetan; horietatik hogeik dituztela amak kartzelan; une honetan, lau haur daudela kartzelan, Picassenten denak; eta aurreko astean jaio zela azkena, han.

Espainiako Estatuko espetxeetan 3 urte bete arte egon daitezke, bi kartzelatan: Aranjuezen (Madril) eta Picassenten. Frantziako Estatuak 18 hilabeteko epea jartzen du.

Amentzako modulu bereziak dituzten kartzeletan egoten dira amak eta umeak, baina, preso ohiek azaldu dutenez, hango bizi baldintzak modulu arrunten oso antzekoak dira: “Errutinak, espazioak, funtzionarioak... berberak dira. Horrenbestez, haurraren premiak kontuan hartuz gero, gabezia asko dituzte”. Elikadurarako, osasunerako eta hezkuntzarako arazoak azpimarratu dituzte: besteak beste, pediatria zerbitzurik eza eta euskaraz hazteko zailtasunak.

Gogoratu dutenez, haurrak ez daude preso, eta, beraz, edozein unetan kartzelatik irten eta sartzeko eskubidea izan beharko lukete, baina hori egin behar dute senideren batekin edota laguntza hori eskaintzen duen elkarteren batekin. Egun amen moduluak dituzten espetxeak, gutxienez, Euskal Herritik 400 kilometrotara daudela gogoratu dute.

Era berean, ama diren preso arrunt batzuek aukera izan dute Espainiako Espetxe Zaintzaren etxe batzuetan egoteko, baina euskal presoei ukatu egiten diete aukera hori, haien lege egoera bereziagatik.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

 ©EUSKALTZAINDIA / BERRIA

Pentsalari poliedrikoa

Igor Susaeta

Federiko Krutwigen jaiotzaren mendeurrena da gaur. Erreferentziazko intelektuala izan zen, eta haren ibili oparoko lan garrantzitsuenetako bi dira Euskaltzaindia berritzeko proposamena 1949an, eta ETAren V. Biltzarreko txostenak.

Justizia errestauratiboaren alde egin du Artolazabalek

Berria

Biktimek eta espetxe ereduak ez dutela zertan antagonikoak izan adierazi du Eusko Legebiltzarrean
Hamaika Gara kanpainaren agerraldia atzo Bilbon. ©MARISOL RAMIREZ/FOKU

Mobilizaziora deitu du Gure Eskuk, Bilbon

Maialen Arteaga

Uztailaren 3an egingo da, eta erabakitzeko eskubidearen aldeko ekintza «politiko eta kulturala»izango da. Hamaika Gara sinadura bilketatik abiatuta, beste egitasmo batzuk hasiko dira gaur zortzi

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Izan zaitez BERRIAlaguna

BERRIAlagunei esker eskaintzen dugu balioz osatutako informazioa. Egizu ekarpena gure eginkizunarekin segi dezagun.

Izan zaitez BERRIAlaguna