Lan Eskaintza Publikoa
Jaurlaritzak 740 plaza eskainiko ditu hezkuntzako zazpi espezialitatetan
Haur Hezkuntza, Lehen Hezkuntza, Ingelesa, Gorputz Hezkuntza, Musika, eta Hezkuntza Berezian Pedagogia Terapeutikoa zein Entzumena eta Hizkuntza dira lanpostuak eskainiko dituzten espezialitateak. Deialdia otsailean argitaratuko da Aldizkari Ofizialean.
2015ean egin zen gisa honetako azken lan eskaintza publikoa. Jaurlaritzak azpimarratu duenez, orduan 275 plaza eskaini ziren arren, haiek eskuratu zituztenez gain beste 491 lagunek ere gainditu zuten proba. Horregatik, azpimarratu du bere ustea: "Badagoela prozesu berri honi berme guztiekin aurre egiteko ongi prestaturiko profesional talde zabala". Horregatik, lan eskaintza egitea erabaki dute. Honela banatuko dituzte plazak:
Haur Hezkuntza: 227
Lehen Hezkuntza: 252
Ingelesa: 57
Gorputz Hezkuntza: 37
Musika. 36
Hezkuntza Berezia. Pedagogia Terapeutikoa: 105
Hezkuntza Berezia. Entzumena eta Hizkuntza: 26
Gaur goizean sindikatuekin Mahai Sektorialeko bilera izan ostean eman du eskaintzaren berri Jaurlaritzak. Berretsi du, legealdi honetan urtean EPE bat antolatuko duela.
Aurkezten direnek bi proba kanporatzaileri egin beharko diete aurre. Aurrenekoaren parte izango dira gai bat idatziz aurkeztea eta ariketa praktiko bat egitea, eta bigarrena programazio didaktiko bat prestatu eta defendatzea.
Otsailean argitaratuko dituzte eskaintzaren xehetasunak Aldizkari Ofizialean.
"Prekarietatea betikotzeko saioa"
Sindikatuak, baina, ez daude gustura lan eskaintzarekin. ELAk salatu du "prekarietatea betikotzea" besterik ez duela lortuko Jaurlaritzak. Gogor salatu du eskaintzak hartzen duen esparruan 9.500 lagun behin-behineko kontratuarekin lanean ari direnean 750 plaza besterik ez ateratzea.
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.
