Larriki gaixo dago Ibon Iparragirre euskal presoa, baina gaur arte epaileak atzera bota ditu hura aske uzteko eskaera guztiak. Orain, berriz, Iparra Galdu Baik plataformak salatu du beste hiru presok jipoitu egin dutela.
Erasoaren berri asteburuan jakin zuten haren gertukoek, hura bisitatzera joan zirenean. Iparragirrek berak azaldu zienez, hiru preso sartu zitzaizkion ziegara, eta, bik heltzen zioten bitartean, besteak jo egin zuen. Kolpeen ondorioz, hortz protesia apurtu zioten. Horretaz gain, hainbat objektu lapurtu zizkiotela ere salatu du ondarroarrak, besteak beste, deiak egiteko txartela.
Hura aske uztearen aldeko plataformak salatu du haren egoerak okerrera egin duela azken hilabeteetan.