Heriotza

Joxemartin Apalategi antropologoa hil da

Joxemartin Apalategi (Ataun, 1949) antropologo eta EHU Euskal Herriko Unibertsitateko irakaslea hil da, Bilbon, Basurtuko erietxean. Antropologiaren eremuko hainbat lan eta liburu argitaratzeaz gain, diziplina hori euskaraz lantzearen bultzatzaile handia izan zen. Parisen egin zituen ikasketak, eta doktore zen 1984tik. Hiletak bihar izango dira, Ataunen, San Gregorioko parrokian, 19:00etan.

2006ko otsailaren 8a
17:04
Entzun
Paris VIIIan egin zituen unibertsitate ikasketak, Soziologia arloan, 1969tik 1972ra bitartean. Ondoren, Euskal Herrira itzuli zen, eta soldadutza egin eta gero, zenbait komunikabidetan aritu zen: besteak beste, Herri Irratian eta Zeruko Argia -n. Ondarroako (Bizkaia) Ikastolako zuzendari ere izan zen bolada batez.

1977an, ordea, Parisera itzuli zen berriro, eta Institut Catholiquen Filosofiako lizentziatura egin zuen. Ondoren, maitrice-a Paris VIIIan, eta hirugarren zikloko ikasketak, berriz, EHESSn egin zituen.

80ko hamarkadaren hasieran itzuli zen atzera Euskal Herria, eta EHU abiatu berrian hasi zen 1980-81 inguruan. Hain justu, hamarkada hartan argitaratu zituen liburu eta ikerketa lanik gehienak. Besteak beste, honakoak:

- Antropologoa hirian, Bilbon (1987).

- Antropologia berria. Ahozko herri produkzioa, l-ll-lll eta lV, (1988). (Doktore tesia zen)

- Etnografiazko galdeketa elikapenaz, (1988).

Era berean, Teresa del Vallek gidatu eta hainbaten artean landu zuten Mujer vasca, imagen y realidad (Euskal emakumea, irudia eta errealitatea (1985) ikerlanean parte hartu zuen.

Halaber, hainbat antropologia bildmatako sortzaile eta zuzendari izan zen ( Antropologiaren Euskal Bilduma, 32 liburukitan argitaratua; Pertsona eta sozietatea).

1984an lortu zuen doktore titula, EHUn.

Euskara Antropologiaren arlora eramaten, eta euskaraz egindako ikerketak bultzatzen lan handia egin zuen.
Iruzkinak
Ez dago iruzkinik

Ordenatu
0/500
Interesgarria izango zaizu
Nabarmenduak
Orain, aldi berria dator. Zure aldia. 2025erako 3.000 babesle berri behar ditugu iragana eta geroa orainaldian kontatzeko.