Albistea entzun

Bruselako manifestazioa "horia" izango da, "Belgikan ez baitago debekatuta"

11:30etan abiatuko da Cinquantenaire parketik, eta Europako Batzordearen egoitzaren aurretik igaroko da.

Marcel Mauri eta Agusti Alcoberro (erdian) ANC eta Omniumeko presidenteordeak hurrenez-hurren, gaurko agerraldian, Bruselan. /
Marcel Mauri eta Agusti Alcoberro (erdian) ANC eta Omniumeko presidenteordeak hurrenez-hurren, gaurko agerraldian, Bruselan. / Samara Velte

Samara Velte -

2017ko abenduak 6 14:36

Gutxienez bost charter hegazkin, dozenaka autobus eta euren kabuz abiatutako milaka katalanek beteko dituzte bihar Brusela erdialdeko etorbideak. Europa: esnatu! Jaiki demokraziaren alde lelopean —berez, Lagundu Kataluniari izenburua ipini behar zioten—, Kataluniako preso politiko independentisten egoeraz ohartarazi nahi dute ANC Biltzar Nazional Katalanak eta Omnium Cultural erakundeek.

Gaur goizean, mobilizazioaren berri eman dute Bruselan bi erakundeetako presidenteordeek, Agusti Alcoberrok eta Marcel Maurik. Bertan, Kataluniako hedabide ugariren eta nazioarteko gutxi batzuen aurrean azaldu dute eurak bertan izateko arrazoia, eta ez euren erakundeetako presidenteak: Jordi Sanchez eta Jordi Cuixart preso daude Espainian urritik. "Ez da soilik barruko afera bat", azaldu du Maurik, Europari ardura eskatuz: "Espainiako Gobernuak Europako Batasuneko oinarrizko eskubideak urratu ditu, besteak beste, adierazteko eskubidea, informatzekoa, elkartzekoa eta manifestatzekoa".

Urriaren 1eko erreferendumeko "errepresioa" ekarri dute gogora, eta ohartarazi dute Carles Puigdemonten gobernuari sedizio delitua egozten diola Espainiako Justiziak: "Hamabost urtera arteko zigorra ekar dezake". Kataluniako presidentea eta haren lau kontseilari Bruselan daude duela hilabete baino gehixeagotik, Bartzelonako parlamentuak independentzia adierazpena onartu zuenetik. "Espainian, elkarrizketa baino, errepresioa nahiago duen sistema judizial bat dago", salatu du Maurik. Abenduaren 21eko hauteskundeez ere ohartarazi du Alcoberrok: "Egoera honetan, nork hitz egin dezake hauteskunde libreez?".

Zerrendaburuak hizlari

11:30ean abiatuko da bihar manifestazioa Cinquantenaire parketik, eta Europako Batasuneko erakunde nagusietako batzuen egoitzen paretik igaroko da. Parte hartzaileei elementu horiren bat eramateko eskatu diete antolatzaileek, preso politikoen omenez; Hauteskunde Batzordeak, hain zuzen ere, debekatu egin du kolore hori Kataluniako kanpainan erabiltzea. "Hemen, Belgikan, ez dago debekatuta, beraz, Brusela horiz beteko dugu", azaldu du Francesc Bellavistak, ANCko nazioarteko idazkariak.

Jean Rey plazan amaituko da 2,5 kilometroko ibilbidea. Bertan, Europako Parlamentuko talde guztietako ordezkariek, Bruselan dauden kontseilari katalanek eta hilaren 21eko hauteskundeetako bi zerrendaburu independentistak hartuko dute hitza: Puigdemontek, Junts Per Catalunyatik; eta Marta Rovirak, ERCtik —CUPek baieztatzeko zain daude, oraingoz, antolatzaileak—-.

"Bruselan urte askoan ikusitako manfiestazio handiena" izango dela iragarri du Bellavistak. "Lan eguna izango da; EBko erakunde eta funtzionarioak bete-betean ariko dira". Antolatzaileek ez dute parte hartzaileen zifrarik eman nahi izan, baina jakinarazi dute webgunean izena eman dutenak gehiago direla egunetik egunera: "Bost charter hegaldi kontratatu ditugu, baina jendea bere kabuz ere antolatu da, eta hori ezin dugu kontrolatu". Belgikako hedabideek 50.000 lagun izan litezkeela argitaratu dute.

 

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Lurrikarek eragindako kalteei so.

5.000tik gora dira oraingoz Ekialde Hurbileko seismoetan hildakoak

Arantxa Elizegi Egilegor - Mikel O. Iribar

Gau osoan zehar lanean jarraitu dute erreskate taldeek, baina toki askotan laguntzaren zain daude oraindik. Ohartarazi dute biktima kopurua handitu egingo dela datozen orduetan. Milaka dira kaltetuak, eta 20.000tik gora zaurituak. Erdoganek hiru hilabeteko larrialdi egoera ezarri du hamar probintziatan.

«Herrialdearen historiako lurrikararik okerrena izan da hau»

«Herrialdearen historiako lurrikararik okerrena izan da hau»

Orsola Casagrande

Kurdistanen krisi mahaia eratu du HDP alderdiak, laguntza kudeatu eta kaltetutako eremuetara iristeko. Aterpeak lortzea da orain lehentasuna Sancarrentzat.

Greziako kostazainen ontzi bat, artxiboko irudi batean. ©HELLENIC COAST GUARD / EFE

Gutxienez hiru migratzaile hil eta hogeitik gora desagertu dira Lesbostik gertu

Mikel O. Iribar

Kostazainek hamasei pertsona erreskatatu dituzte. Bizirik atera direnen esanetan, haien ontzia haitzen aurka jo ostean hondoratu da.

Palestinar bat astelehenean Jeriko hirian izandako tiroketen arrastoei begira. ©EFE

Israelgo armadak adin txikiko palestinar bat hil du tiroz

Berria

Gazteak haien kontra tiro egin zuela adierazi dute armadaren iturriek. Urte hasieratik gutxienez 42 palestinar hil ditu Israelek.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.