Gobernu berria osatu arte, Moncloak indarrean izango du 155. artikulua

Generalitatearen ardura bere esku izango du Espainiako Gobernuak Katalunian legebiltzar berria osatzen denean ere.

Rajoy, Moncloan, artxiboko irudi batean. / JuanJo Martín/Efe

2017ko abenduak 21 00:26

Espainiako Gobernuak Generalitatearen eskumen guztiak bere gain izango ditu gaurko bozen ostean ere. Legebiltzarrak presidente berria aukeratu eta hark gobernua osatu arte ez du gidaritza utziko Moncloak.

Horretarako, gaurko aulki banaketa jakin, batuketa posibleak ikusi eta akordioak egin beharko dituzte alderdiek. Legebiltzarrak aukeratuko du lehendakari berria, eta haren esku geldituko da gero gobernua osatzea.

Espainiako Ministroen Kontseiluak halaxe egitea erabaki zuen Espainiako Konstituzioaren 155. artikulua aplikatzea erabaki zuenean. Gobernu berria osatu arte, Espainiako Gobernuko ministroen esku egongo dira Generalitateko Kontseilaritzak, eta Mossoak Barne Ministerioaren agintepean. Ardurak Kontseilari berrien esku utziko dituzte, Generalitate berria osatutakoan.

Inork ez badu lortzen gehiengoa osatzeko lain babes, Mariano Rajoy Espainiako gobernuburuaren esku geldituko litzateke berriz ere hauteskundeetara deitzeko ardura. Nolanahi ere, Efe berri agentziari Moncloako iturriek esan dietenez, beren asmoa litzateke "ahal bezain azkarren" Generalitateari itzultzea ardura.

Bihar aztertuko ditu hauteskundeetako emaitzan Espainiako Gobernuak, Ministroen Kontseiluan.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Izan BERRIAlaguna