Hilketarekin hunkituta eta lur jota dago Zornotza, eta gaur hunkidura hori salaketa bihurtu dute. Udalak adierazpen instituzional bat onartu du, eta elkarretaratzera deitu du iluntzean, eta ehunka herritarrek bat egin dute deialdi horrekin.
Udaletxe aurreko plazan egin dute elkarretaratzea. Ehunka lagunek bete dute plaza, isil-isilik, hilketa gaitzesteko eta Ibon Urrengoetxearen senide eta lagunei elkartasuna eta berotasuna adierazteko. Protesta bukatu dutenean, txalo luze jo dute bertara batutakoek.
Abenduaren 23ko goizaldean, bi pertsona gerturatu zitzaizkion Urrengoetxeari Bilboko Plaza Biribilaren inguruan, ustez lapurtzeko asmotan, eta kolpeka ekin zioten, hilik utzi zuten arte. Ertzaintzak laguntza eskatu du erasotzaileak identifikatzeko.
Gaurko protestaren aurretik, hiletak egin dizkiote Urrengoetxeari. Futbol jokalari ohia zen, eta oso ezaguna zen herrian.
Udaleko bozeramaileen batzordeak gaur egin du bilera, eta agiri instituzional bat onartu du. Gogor salatu dute hilketa, "mina eta gaitzespena" agertu dituzte, eta familiari "babes osoa" azaldu diote.