Zergatik dago gaizki ikusia bakarrik egotea, psikologoek gomendatzen badute? Zer mugiarazten du bakarrik egoteak pertsonengan? Galdera horiek erantzungo ditu bihar Bizigiro saileko gehigarriak; horretarako, Edurne Saizar Beldarrain psikologoarekin hitz egin du, baita gauzak bakarrik egiten dituzten hiru lagunekin ere.
Ohi bezala, zinemaren inguruko kontuak landuko ditu Gontzal Agotek. Asghar Farhadiren Todos lo saben thriller psikologikoaz idatzi du: Cannesen estreinatu ondoren, aretoetara ailegatuko da irandar baten begietatik kontatutako istorio espainarra.
Horrez gain, astebururako proposamenak ere egingo ditu. Esaterako, Euskal Gaztaren azoka egingo dute bihar eta etzi Idiazabalen (Gipuzkoa). Artzainen lana ikusarazteko asmoz antolatu dute, eta herriko Olazargibel baserriko artzainak omenduko dituzte.
