ETAren amaiera abiapuntu gisa hartuta, hainbat kulturgileri obra bat sortzeko eskatu die BERRIAk. Katixa Dolhare-Zaldunbideren koplak dira hauek:
Populiaren makila hintzan
Ezagutu ez dudan garaian
Krudelegi jokatu hondarrean
Erabaki ona hartu huan
Isilarazirik armen hotsa
Entzunik herriaren otoitza
Bake bizitzari utziz hatsa
Aska dadila jendearen hitza
Nork zer irabazi ta zer galdu
Gordetakoa nola zabaldu
Gezur egiak nola ulertu
Beste gizaldiak erranen du
Gatazketatik datoz gastuak
Baztertze ta sakrifizioak
Gobernu zitalak ohartuak
Horretan dira aberastuak
Beldurra digute merke saltzen
Berek elkorrarena egiten
Baina Historia aitzinatzen
Gizarteak du inposaturen
Zuzentasun gosez gaude ezta
Nun deabru dago solaskidetza
Kexu daude zezen ta oilarra
Jendartu baitzaie etsai basa
Euskal Herriaren eraikuntza
Ez dezagun burutu totelka
Mintzoa bada gure indarra
Erna euskaldun ele anitza
In nomine matris et filiae
Etorkizuna nahi nuke eme
Iuris, veritatis et linguae
Umorean ere daukat fede
Itsu okerrei erran nahian
Kanbon zaudete Euskal Herrian
Errobi ibaitik dugun edan
Biziberritzearen izenean
