Athleticeko erdilari Raul Garciak (Iruñea, 1986) urtebetez luzatu du talde zuri-gorriarekin duen kontratua. Hala, gauzak ondo bidean, 2020ra arte ariko da Bilboko taldean. Klubak ohar bidez eman du akordioaren berri; 2019ko ekainean zen amaitzekoa kontratua, baina hura urtebetez luzatzeko klausula gauzatzea erabaki dute bi aldeek.
Garcia 2015-2016ko sasoian iritsi zen Athleticera, eta ordutik jokalari garrantzitsua izan da zuri-gorrien eskeman. Amaitu berri den sasoian 34 partida jokatu ditu Espainiako Ligan, eta 10 gol sartu ditu. Aurrez, Atletico Madrilen eta Osasunan aritu zen. Gorritxoekin egin zuen debuta lehen mailan, 2004-2005eko denboraldian.
