ISTRIPUA

29 urteko gizon bat hil da Leioan, edanda zihoan gidari batek istripua eraginda

Goizaldean gertatu da ezbeharra Artatzako biribilgunean. Hildakoa autoarekin geldirik zegoen biribilgunean, eta beste auto batek jo du. Atxilotuta dago gidaria.

Berria -

2018ko ekainak 5

Ertzaintza ikertzen ari da ezbeharra zer-nola gertatu den. Lehen ikerketen arabera, Artatzako biribilgunean geldirik zegoen hildako gizona autoarekin —udaltzainek geldiarazita autoaren argietako bat itzalduta zuelako, hedabide batzuen arabera—, eta abiadura handian zetorren beste auto batek jo du. 04:30ean gertatu da istripua.

Kolpearen ondorioz, auto barruan harrapatuta geratu da gizona, eta suhiltzaileek atera behar izan dute. Hil egin da. Gizonak 29 urte zituen, eta ertzaina zen. Lanera bidean zihoan istripua gertatu denean.

Beste autoko gidaria atxilotuta dago, positibo eman baitu alkohol eta droga proban. Gurutzetako ospitalera eraman dute, zaurituta.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna