Politika

Espainiako Gobernuak dio ez duela egin hurbildu ditzakeen presoen zerrendarik

Marian Beitialarrangoitiak egindako galderari erantzun dio espetxe guztietara eskatu duela informazioa, baina helburua ez zela euskal presoak gerturatzea. "Fitxategiak eguneratzeko" eskatu zuten informazioa.

Apirilean manifestazio bat egin zuten Bilbon.
Apirilean manifestazio bat egin zuten Bilbon. Aritz Loiola/Foku

Berria -

2018ko uztailak 16

Euskal Herrira gerturatzeko baldintzak beteko lituzketen presoen zerrendarik ez dago. Espainiako Gobernuak, behintzat, ez duela egin jakinarazi dio EH Bilduri, Marian Beitialarrangoitiak egindako galdera bati erantzunez. "Zerrendarik ez dago, eta ez gara ari egiten".

Espainiako Gobernuak onartu du otsailaren 23an txosten bat bidali zuela espetxe guztietara, FIES graduan edo lehen graduan dauden presoei buruzko galderak igorri zizkien, izan diren gradu aldaketa, baimen eta antzeko eskaerei buruz. Banakako tratamenturako programa bat du Espainiako Gobernuak, PIT, eta programa horretarako atxitzea eskatu duen presorik ba al dagoen ere galdetu die. Presoren bati "birgizarteratzeko legezko bideak" onartu ahal izateko baldintzarik aldatu al den ere galdetu die espetxeetako zuzendariei.

Nolanahi ere, informazio hori ez zegoen bideratuta euskal presoak Euskal Herrira hurbiltzeko egitasmoan. Hala dio Espainiako Gobernuak. Idatzizko erantzunean dioenez, "ohikoak eta normalizatuak" dira halako informazio eskaerak, eta fitxategiak eguneratuta edukitzeko egiten dute.

 

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna