Espainiako Kongresuko Diputazio Iraunkorreko Mahaia gaur eguerdian batzartu da, eta bertan onartu ditu ministro ugariren agerraldiak. Fernando Grande-Marlaska Barne ministroa izango da kongresuan mintzatuko direnetako bat.
Hain justu, Grande-Marlaskak berak eskatu zuen agerraldia. Besteak beste, azalpenak eman nahi ditu euskal presoekiko espetxe politikan Espainiako Gobernuak hartu nahi duen norabidearen inguruan. Zehazki, "ETA erakunde terroristako preso ugariren egoeraren inguruan" eman nahi ditu xehetasunak".
Pedro Sanchez Espainiako Gobernuko presidente izendatu zutenetik, euskal presoekiko bestelako politika bat abiatzeko asmoa adierazi zuten Sanchezek berak eta Grande Marlaskak. Harrezkero, bost izan dira Euskal Herriratutako presoak. Olga Sanz Martin eta Xabier Moreno Ramajo izan ziren aurrenekoak; hirugarren gradua eman zieten biei, eta Villabonako espetxetik (Asturias, Espainia) Basaurira (Bizkaia) lekualdatu zituzten. EPPK Euskal Preso Politikoen Kolektibotik aldenduta daude biak. Alfredo Remirez izan zen hurrengoa, Darocatik Iruñeko espetxera ekarrita.
Joan den astean, berriz, Jon Ander Cob eta Julen Goikoetxea Altsasuko auziagatik espetxeratutako gazteak lekualdatu zituzten, Madrilgo Soto del Realetik Zaballara (Araba). Auzi berean zigortutako Adur Ramirez de Alda eta Aratz Urruzola izan litezke Euskal Herriratutako hurrengo presoak. Udan zehar lekualdatze gehiago egon zitezkeela iragarri zuen Jesus Loza Espainiako Gobernuko ordezkariak, baina Foro Soziala "kezkatuta" agertu zen joan den astean Sanchezen gobernuak urratsik egin ez duela eta.
