Albistea entzun

goizeko kronika bartzelonatik

Ezohikotasunaren Diada

Quim Torra Generalitateko presidenteak "eustera" edo "konformatzera" deitu ditu kataluniarrak.

Igor Susaeta -

2018ko irailak 11 07:10

Ohi bezala, Rafael Casanovaren monumentuaren egindako lore eskaintzekin hasi dira Kataluniako egun nazionalaren ekitaldiak. 09:00ak zirenean, Generalitateko ordezkariak izan dira aurrenekoak eskaintza egiten, eta, horren ondoren, Elsa Artadi Presidentetza kontseilari eta bozeramailea (JxC Junts Per Catalunya) mintzatu da: "Arratsaldeko mobilizazioak erakutsiko du, dugun egoeratik harago —politikari presoekin eta erbesteratuekin—, bi milioi pertsona baino gehiago garela Katalunia independentea exijitzeko mobilizatzen garenak". ANC Biltzar Nazional Katalanak antolatu du arratsaldeko mobilizazioa, eta, jakinarazi dituen datuen arabera, 460.000 lagunek eman dute izena. Halere, jende gehiago biltzea espero da. 17:14an hasiko da, eta, Fem la Republica Catalana lelopean, jendetza hori Diagonal etorbidean pilatuko da, Glories plazaren eta Palau Reialen arteko zatian; sei kilometro pasa, alegia.

Baina ezohikoa izango da aurtengo Diada. Izan ere, zenbait buruzagi independentista preso edo erbesteratuta daude, iazko urriaren 1eko erreferenduma bultzatzeagatik eta antolatzeagatik. Horiek izan ditu gogoan Torra Generalitateko presidenteak (JxC), Diadarako grabatutako bideo instituzionalean. Eta nabarmendu du "presoengatik eta erbesteratuengatik" errepublika "gauzatzeko" konpromisoa hartu duela.

Sergi Sabria ERC Esquerra Republicanako bozeramaileak nabarmendu du ez dutela "etsiko" harik eta katalanek haien etorkizuna "erabateko askatasunez" erabakitzeko aukera eduki arte.

PDeCATen aldetik David Bonvehi haien lider berriak hitz egin du, eta Pedro Sanchez Espainiako Gobernuko presidenteari esan dio "azkar" aurkeztu dezala Kataluniarentzat duen proposamena. Andoni Ortuzar EAJren EBB Euzkadi Buru Batzarreko presidenteak, hain zuzen, PDeCATekoekin parte hartu du lore eskaintzan. Presoei "elkartasuna" helarazi die, eta "elkarrizketa" eskatu du. "Politika behar da; politika hitz larriekin. Mehatxutik, zigorretik, mendekutik, ez da konponduko Kataluniako auzia". Esan du EAJ "laguntzeko" prest dagoela, baina ez duela "bitartekaritza" lanik egingo, ez dela "beharrezkoa". Presoen eta erbesteratuen egoerari dagokionean, "gehiegikeria bat" dela adierazi du.

Otegi: "Kataluniako errepublika egingo dute"

EH Bilduk bere kabuz egin du lore eskaintza. Horretan parte hartu du Arnaldo Otegi koalizioaren koordinatzaile nagusiak. Azpimarratu du Katalunian martxan jarritako prozesuak ez duela "atzera bueltarik". Otegiren esanetan, "oztopoei" aurre egin beharko diete katalanek, "gorabeherak" edukiko dituzte, baina "Kataluniako errepublika egingo dute". EH Bildukoarentzat, "demokrazia", bai Euskal Herrian, baita Katalunian ere, "burujabetzaren bidetik lortuko da".

Lledoners kartzelan preso dauden politikari kataluniarrekin bildu da. Fisikoki "oso ondo" ikusi ditu. "Preso daude haien herriari hitza emateagatik. Harro ikusten ditut horregatik". Otegirentzat, Kataluniak egindakoa "izugarria" da: "Prozesu demokratiko bat martxan jarri dute Europan". Eta epaiketaren harira "baikorra" ez izan arren, argi dauka: "Ezin da herrialde baten askatasuna gelditu errepresioarekin. Norbaitek pentsatzen badu katalanen askatasun gosea kartzelaldiekin saihestuko dutela, oso oker dago".

Ciutadansek ekitaldi propioa

Ciutadansek eta PPC ez dute lore eskaintzarik egin. Ciutadansek ekitaldi propio bat antolatu du Maitasuna gorrotoa baino indartsuagoa da lelopean, eta Albert Rivera Ciudadanoseko presidenteak esan du Torra Espainiako Estatua "mehatxatzen" ari dela, "legearen eta justiziaren gainetik" jokatzen ari dela.

PSCk egin du lore eskaintza, eta Miquel Iceta Kataluniako sozialisten idazkari nagusiak "elkarrizketaren" beharra nabarmendu du. "Botere judizialak hartu beharreko erabakia da", adierazi du, buruzagi independentistei egingo dieten epaiketaz galdetu diotenean.

Alderdi politikoez eta instituzioez gain, Kataluniako eta Kataluniatik kanpoko hainbat erakundek eta elkartek egin dute lore eskaintza Rafael Casanovaren monumentuan.

 

 

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Elkarretaratzea Melillan

Isiltasunaren oihu beltzak

Jone Arruabarrena

37 migrante hil ziren joan den ostiralean Marokoren eta Espainiaren arteko mugan, gobernuek oraindik argitu ez dituzten arrazoiengatik. Gertakariak salatzeko, elkarretaratzea egin dute Melillan bizirik atera ziren migratzaileek.

«Migratzaileak modu eredugarrian antolatu dira»

«Migratzaileak modu eredugarrian antolatu dira»

Jone Arruabarrena

Labaka eta Soriano elkartasun langileek azaldu dute joan den astean Melillako hesia gurutzatu zuten migranteak antolatzen ari direla beren eskubideen alde: «Haiek badaukate ahots propioa».

Bi herritar oinez, New Yorkeko zentral elektriko baten ondotik igarotzen. ©Justine Lane, EFE

AEBetako Gorenak CO2 isurketak mugatzea zaildu dio Washingtoni

Iñaki Petxarroman

Gobernuaren esku den Ingurumena Babesteko Agentzia isurketak mugatzeko ahalmenik gabe utzi dute epaile atzerakoiek. Erregai fosilen aldeko lobbyen garaipena da sententzia.

Xi Jinping Txinako presidentea, artxiboko argazki batean ©EFE

«Blokeen arteko konfrontazioa» sustatzea egotzi dio Txinak NATOri

Igor Susaeta

Kontzeptu estrategiko berrian jasotakoaren harira, «etsaiak sortzeko taktika zaharrarekin» jarraitzea leporatu dio Pekinek aliantza militarrari.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...

Izan BERRIAlaguna

Zure babes ekonomikoa ezinbestekoa zaigu euskarazko kazetaritza independente eta kalitatezkoa egiten segitzeko.