Angel Bados Iparragirre (Olazagutia, Nafarria, 1945) eskulturgileak jasoko du Espainiako Arte Plastikoen Sari Nazionala, gaur jakinarazi dutenez. Espainiako Kultura eta Kirol Ministerioak eman ohi du sari hori; 30.000 euro jasoko ditu saridunak. Honako hauek osatu dute aurtengo epaimahaia: Angela de la Cruz artistak eta iazko garaileak, Estrella de Diego Arte Garaikideko katedratikoak, Blanca de la Torre erakusketen komisarioak eta Karin Ohlenschlager Laboral Arte eta Sorkuntza Industrialeko Zentzoko ekimenen zuzendariak.
Badosen eskultura jarduera erabat loturik egon da Leioako Arte Ederren Fakultatean (Bizkaia) irakasle modura egindako lanarekin. Hainbat artista belaunaldiren irakasle izan da Bados. Txomin Badiolarekin batera, Artelekuko (Donostia) eskultura ikastaroetako gidari izan zen (1994-1998). Han, Euskal Herriko hainbat artistaren ibilbidea sendotzea eta gidatzea lortu zuten, besteak beste, Itziar Okariz, Ibon Aranberri, Jon Mikel Euba, Asier Mendizabal, Ana Laura Alaez eta Sergio Pregorenak.
Iazko urrian elkarrizketa sakona eman zion BERRIAri.
