Donald Trump presidentetzara heldu zenean iragarri zuen Obamacare indargabetuko zuela, baina ahalegina Senatuan trabatuta geratu zen. Hiru errepublikanoren aurkako botoei esker, bestelako estaldurarik ez zutenentzako doako osasun sistemari eustea lortu zuten demokratek. Ordea, orain badirudi auzitegiek egingo dutela ordezkari politikoek lortu ez zutena.
Texasko barruti bateko epaile Reed O'Connorrek hartu du erabakia. Trumpek berak bultzatutako zerga erreformari lotuta dago. Ordura arte, osasun asegurua ez edukitzeagatik isuna jaso zezaketen herritarrek; erreformaren ostean, ordea, ez da halakorik. Hala, epaileak ebatzi du horren ostean Obamacare indargabetuta geratuko dela, eta arrazoi eman die haren aurkako salaketa jarri duten hogei bat estatutako buruzagiei.
Epaia, hala ere, ez da irmoa, eta Kaliforniako Fiskaltzaren bozeramaile Xavier Becerrak iragarri du Helegite Auzitegira joko dutela. Aldiz, Trump bera pozik agertu da epailearen erabakiarekin, eta albistea ontzat jo du Twitterreko bere kontuan idatzitako mezuan.
Wow, but not surprisingly, ObamaCare was just ruled UNCONSTITUTIONAL by a highly respected judge in Texas. Great news for America!
— Donald J. Trump (@realDonaldTrump) 15 de diciembre de 2018
Senatuan demokratek duten eledun Chuck Schumerrek, bestalde, hondamenditzat jo du ebazpena: "Hondamendia izango da AEBetako milioika familiarentzat". 2010ean, AEBetan 45 milioi lagunetik gora ziren inolako osasun estaldurarik ez zutenak; Obamacare indarrean sartuz geroztik, ordea, 28 milioira jaitsi zen kopurua.
