AEBek Sirian dituzten 2.000 soldaduak beren herrialdera itzultzeko prozesua hasi du formalki Pentagonoak. Agindua sinatuta dagoela adierazi du EFE berri agentziak, Pentagonoko iturriak aipatuta. AEBetako agintari militarrek ez dute, ordea, tropen erretiratzearen epeei buruzko xehetasunik eman.
CNNren arabera, Jim Mattis generalak sinatu du agindua. Mattisek karguari uko egin zion joan den ostegunean, eta otsailaren 28rako zegoen aurreikusita haren kargu uztea. Aldiz, Mattis azkarrago ordezkatzea erabaki du Trumpek. Aurreratu duenez, Patrick Shanahan izango da Mattisen ordezkoa. Behin-behineko Defentsa idazkari berriak urtarrilaren 1ean hartuko du ardura bere gain. AEBetako presidentearen Twitter kontu ofizialetik eman zuen Trumpek erabakiaren berri.
I am pleased to announce that our very talented Deputy Secretary of Defense, Patrick Shanahan, will assume the title of Acting Secretary of Defense starting January 1, 2019. Patrick has a long list of accomplishments while serving as Deputy, & previously Boeing. He will be great!
— Donald J. Trump (@realDonaldTrump) 23 de diciembre de 2018
Trumpek tropen itzulera iragarri hurrengo egunean egin zion karguari uko Mattisek. Presidentearekiko kritiko agertu zen orduan, eta kezka agertu du AEBek Sirian dituen aliatuekiko izan duen jarrerarekin. Mattisek nabarmendu du AEBek "errespetuz" jardun behar duela bere aliatuekin, "erabakimenez" eta "argi" jokatu behar duela lehiakideekin. Azken horien artean aipatu zituen Txina eta Errusia.
Tropak Siriatik aterako zituela iragarri zuenean, Trumpek nabarmendu zuen EI Estatu Islamikoa garaitzea lortu zutela eta hori zela armada Sirian mantentzeko arrazoi bakarra. AEBetako soldaduek nazioarteko koalizio batean parte hartu dute Sirian. Koalizio hori elkarlanean aritu da milizia kurduekin, EIren aurka.
Armada estatubatuarraren presentziarik gabe, Trumpek Sirian "hutsunea" utziko duela kritikatu du Mattisek. Ohartarazi duenez, "El Asadek edo bere laguntzaileek" egoera baliatu dezakete. Horrez gain, kurduak "arriskuan" utziko dituela gaineratu du, Turkiak kurduen lurretan esku har dezakeela iritzita. Aliatuak ere kezkatuta agertu dira.
AEBetako tropak erretiratu ondoren, EI berriz indartu daitekeenaren kezka azaldu dutenei erantzunez, Trumpek ziurtatu du Turkiak eragotziko duela hori. Tayyip Erdogan Turkiako presidenteak adierazi duenez, abenduaren 14an Trumpi hitz eman zion Siria "garbitzeaz" arduratuko zela.