Pablo Ibar

Epaileak auzitik baztertu du damututako epaimahaikidea

Floridako epaimahai batek hiru lagunen hilketaren errudun jo zuen Pablo Ibar euskal jatorriko estatubatuarra, urtarrilaren 19an. Epaimahaikide batek "presioak" jasan zituela salatu zuen eta erabakiarekin damutu zen.

Pablo Ibar, bere kontrako epaiketan. /
Pablo Ibar, bere kontrako epaiketan. / Giorgio Viera/EFE

Berria -

2019ko urtarrilak 31

Dennis Bayley epaileak Pablo Ibar epaitzeko epaimahaitik baztertu du, hura errudun jo izanagatik damututa agertu zen epaimahaikidea. Hala jakinarazi du Andres Kakenberger Heriotza Zigorraren Aurkako Elkartearen bozeramaileak.

Epaiketatik baztertu duten epaimahaikideak "presioak" jasan zituela salatu zuen, Ibar errudun jotzeko. Bayleyren aurrean onartu zuenez, webugune batean adierazi zuen "asmo txarrik gabeko bullyinga" jasan zuela "larritasun handiko" auzi batean. Ezizenen babesean egin zituen adierazpen horiek, eta nola jokatu behar zuen galdetu zien webguneko gainerako erabiltzaileei. Epaimahaikide damutuak ukatu egin dio epaileari kanpoko informazioekin "kutsatu" denik.

Fiskaltzak epaimahaikidea auzitik kanpo uztea eskatu zion epaileari, eta hark bat egin du fiskaltzaren jarrerarekin. Defentsak, berriz, epaimahaian parte hartzen jarrai zezala eskatu zuen, ez zuelako auziarekin lotutako informaziorik argitaratu, ezta kanpotik informaziorik jaso ere. Erabakiari helegitea aurkeztuko diola aurreratu du defentsak.

Baztertutako epaimahaikidea epailearekin harremanetan jarri zen duela astebete, Ibar errudun jotzeko erabakiarekin damu zela adierazteko —epaimahaiko 12 kideek ahobatez hartu zuten erabakia—.

Epaimahaikide damutua auzitik kanpo uzteko erabakiak zaildu egin dezake Ibarri bizi arteko zigorra jartzeko aukera. Izan ere, Ibarri heriotza zigorra ala bizi arteko espetxealdia ezarri erabaki behar du epaimahaiak. Aukeretan lehenak derrigorrezkoa du epaimahaikideen erabateko adostasuna. Heriotza zigorra kide guztiek eskatzen ez badute, bizi arteko kartzela zigorra ezarriko zaio Ibarri. Epaimahaiak ahobatez heriotza zigorra eskatuko balu ere, epaileak aukera du zigorra bizi arteko espetxealdira mugatzeko. Hala ere, ez da ohikoa izaten, eta defentsak ez du uste kasu honetan hala gertatzeko aukera handirik dagoenik.

Otsailaren 25ean hasiko da Ibarren kontrako zigorra ebazteko fasea.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna