“Gau on. Jakinarazten dizuet Euskal Herriko Garapen Kontseiluko presidente kargutik dimititu dudala, arrazoi pertsonalengatik. Aidetasunez. Caroline Phillips”. Ostegun gauean prentsari bidalitako agiri baten bidez jakinarazi zuen Caroline Phillipsek Garapen Kontseiluko kargua uztea erabaki zuela. Biharamun goizean, beste agiri batean, Phillipsen erabakia “deitoratu” zuen Garapen Kontseiluko bulegoak eta eskerrak eman zizkion erakundean egindako lanagatik. Orain arte lehen presidenteorde postua betetzen zuen Philippe Maitek beteko du haren kargua.
1994ean sortutako elkartea, Euskal Elkargoari lotu zitzaion ofizialki iazko udazkenean, Ipar Euskal Herriko gizarte zibilaren ordezkaritza gisa, instituzioak eginen dituen politika publikoak «argitzeko» helburuarekin. Estatutuak aldatu eta egitura zabaldu eta berritu zuen horretarako EHGK-k. Bere lehen ekarpena ere egin zuen zuzendaritza kontseiluak: Zein Euskal Herri bihar, Euskal Elkargoarekin? izenburupean, lurraldearen diagnostikoa egin, eta norabideak proposatzen ditu.
