Indarkeria matxista

Bi gizon atxilotu dituzte, kalean emakumeei eraso egitea leporatuta

Igandean izan zen erasoetako bat, Arrasaten (Gipuzkoa). Atzo, berriz, gizon bat atxilotu zuten udaltzainek Bilbon, andre bat jotzea egotzita.

Indakeria matxistaren aurkako mobilizazio bat, artxiboko argazkian.
Indakeria matxistaren aurkako mobilizazio bat, artxiboko argazkian. Jon Urbe/Foku

Berria -

2019ko martxoak 12

Bilboko Udalak gaur jakinarazi duenez, gizon bat atxilotu zuten atzo eguerdian udaltzainek, Zazpikaleetan. Emakume batek poliziengana jo zuen, gizon bat jotzen ari zitzaiolako, eta udaltzainek atxilotu egin zuten erasotzailea. Udalak gaitzetsi egin du erasoa, eta "konplize ez izateko" deia egin die herritarrei.

Ertzaintzak ere eman du gaur antzeko eraso baten berri. Arrasaten gertatu zen hori, igandean. Gizon bat emakumezko bikotekideari joka hasi zen kalean, eta atxilotu egin zuten ertzainek. Andrea ospitalera eraman behar izan zuten, zauriak artatzeko. Udalak gogorarazi du "instituzioek nahiz euskal gizarte osoak" dutela indarkeria matxistaren aurka "borrokatzeko ardura".

Arrasateko Martxoaren 8ko plataformak elkarretaratzera deitu du gaurko, igandeko erasoa salatzeko. 20:00etan izango da bilkura, herriko plazan.

Atzo, EAJk ekitaldi bat bertan behera utzi zuen Errenterian (Gipuzkoa), andre batek eraso matxista bat pairatu zuela ikusita.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna