Jaurlaritzaren kultura dekretuak hasieratik harrotu zituen hautsak kultur munduan. Besteak beste, areto eta tabernetan kontzertuak gehienez hilean bi eta urtean hamabi izatera mugatzea zen haren helburua; puntu horrek sortu du, batik bat, kezka sortzaileen eta areto zein tabernetako jabeen artean, eta zehaztapen hori da, hain justu, orain ezabatzea nahi dutena. Segurtasun Sailak aldaketa proposamen bat aurkeztuko du, eta hor kendu egingo du gehienezko ikuskizun kopuruaren aipamena.
Arteak Ireki plataforman bildu dira dekretuaren aurkakoak. Hain zuzen, bihar, hainbat herritan mobilizazioak egingo dituzte, "auzo, herri eta hirietako kultur espazioen balioa defendatzeko".