Albistea entzun

Mozal legea

Hala Bediko kazetari bati jarritako zigorra bidezkoa den ebatziko dute auzitegiek asteartean

Errekaleorren egindako polizia operazioaz informatzeagatik zigortu zuten, 2017an. Irrati libreak elkarretaratzera deitu du epaiketaren aurretik, 11:30etan, Gasteizko Justizia Jauregiaren aurrean.

Hala Bedi

Jon Rejado -

2019ko martxoak 29

Hala Bediko kazetari bati mozal legea baliatuta jarritako zigorra administrazioarekiko auzien epaitegietara helduko da, datorren asteartean. Hala jakinarazi du irrati libreak. Lehen aldia da hori gertatuko dela Araba, Bizkai eta Gipuzkoan. Hala Bedi irratiak gogora ekarri du Eusko Legebiltzarrak onartu zuela proposamen bat lege hori ez ezartzeko.

Gasteizko irrati libreak argudiatu du Mikel Saenz de Buruaga kazetariaren aurkako salaketaren oinarria, polizia txostena, "faltsua" dela. Txosten hori baliatuta, eta mozal legea ezarriz, 602 euroko isuna jarri zioten kazetariari. Informatzeko eskubidearen aurkako erasotzat jo zuen Hala Bedik. Hainbat eragileren babesa izan du bidean: Euskal Kazetarien Elkartea, Kazetarien Euskal Elkargoa, Espainiako Informazio Askatasunaren Aldeko Elkarteak, hainbat hedabide, herri mugimenduko elkarteak...

Hala Bedik bide administratibo guztiak agortzea erabaki zuen. Horiek amaituta Eusko Jaurlaritzako Segurtasun Sailak isuna berretsi zuen, eta irrati libreak erabaki zuen gaia administrazioarekiko auzien epaitegietara eramatea, 2018ko apirilean. Urte baten buruan epaiketa gertatuko da.

Errekaleorreko argi mozketa

Isunaren jatorria 2017an dago, maiatzaren 18an. Segurtasun Sailak Gasteizko Errekaleor auzoko argindarra moztu zuten eguneko gertakarien testuingurua baliatu zuen kazetariari zigorra jartzeko. Poliziaren salaketaren arabera, kazetariak gainditu zuen Ertzaintzak auzoaren inguruan jarritako hesia, eta, gero, "indarrez oldartu" zitzaien hesiaren barruan zeuden poliziei. Desobedientzia edo agintaritzari aurre egitea leporatu zioten.

Mikel Saenz de Buruagak kontaketa hori gezurtatu du. Polizia hesia jarri aurretik barruan zegoela argudiatu zuen. Are, nabarmendu du bertan zegoela ertzain batek gertaerez informatzeko baliatzen ari zen sakelako telefonoa lurrera bota eta apurtu ziola. Saenz de Buruagak azaldu du, telefonoa apurtzearekin batera, haren bertsioa berresten zituzten argazki eta bideoak galdu zirela.

Zigortutako kazetariak, bertan zegoen Hala Bediko beste kazetari batekin batera, lanean ari zirela egiaztatzen zuten agiria erakutsi, eta identifikazio zenbakia eskatu zioten poliziari. Ertzainak, akreditazioa kendu, eta nortasun agiria eskatu ziela azaldu du zigortutako kazetariak. Azkenik, agiriak itzuli eta identifikazio zenbakia eman zien, baita, kazetarien arabera, mehatxatu ere.

Isuna ordaintzeari, uko

Hala Bedik jakinarazi du salaketa ez zela orduan heldu, hainbat hilabete geroago baizik. Hori jaso ondoren irrati libreko kideak batzartu ziren, eta isuna ez ordaintzea erabaki zuten. "Lege bidegabea den heinean, desobeditzeko zilegitasuna dugula uste dugu", argudiatu zuten. Mozal legeak kazetarien jardunari ez ezik herritar guztiei eraso egiten diela gaineratu zuten Hala Bediko kideek. "Mozala jarri nahi diote gure lanari, gure informatzeko eskubideari, baina ez gaude prest horretarako".

Tramiteek aurrera egin ahala kazetariak "babesgabetasun egoera" bizi izan duela salatu du Hala Bedik. Gaineratu du ere poliziaren txostenak ez dituela egiaztatzen isunaren oinarri diren gertakariak. Besteak beste, irrati libreak azaldu du salaketan ez dela agertzen Saenz de Buruagak bere burua kazetari bezala identifikatu zenik. "Gai horren inguruan gezurretan aritzea bereziki larria da, hainbat pertsonak ikusi baitzuten hala izan zela".

Hala Bedik hausnartu du aipatu zigorraren bitartez "oso kazetaritza zehatza" zigortu nahi izan dutela: "Herri mugimenduekin elkarlan estua duen kazetaritza, eta botere abusua zein poliziaren indarkeria hurbiletik behatzen duena". Horren harira gogora ekarri dituzte Argiako bi kazetari: Axier Lopez, Segurtasun Sailak mozal legea baliatuta zigortu zuten lehen kazetaria; eta Lander Arbelaitz. "Azken kasu horretan ez zen aipatu legea erabili, baina logika bera jarraitzen du".

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna

Albiste gehiago

Ikasmahaia bizkarrean hartuta

Ikasmahaia bizkarrean hartuta

Iker Tubia - Nafarroako Hitza

Iruñeko Udal Ikastolaren memoria osatu dute ikastetxeen eta norbanakoen ekarpenei esker. Jasotako dokumentu, argazki eta heziketa material guzia Nafarroako Artxibo Garaikidean ari dira gordetzen.

Subillan egin nahi zuten gasa ustiatzeko proiektua. Artxiboko irudi batean, lursail horietako bat. ©JAIZKI FONTANEDA / FOKU

Eusko Jaurlaritzak uko egin dio Armentia II-n gasa ustiatzeari

Jon Ordoñez Garmendia - Jone Bastida Alzuru - Lander Muñagorri Garmendia

Ohar batean azaldu duenez, Klima Aldaketaren eta Trantsizio Energetikoaren lege proiektua onartu ondoren, «ez du zentzurik». EH Bilduk eta Elkarrekin Podemosek esan dute albiste pozgarria dela

Astra Zenecaren txerto dosiak. ©LESZEK SZYMANSKI / EFE
Lazkaoko (Gipuzkoa) baheketako irudi bat, martxoaren amaierakoa. ©Jon Urbe / Foku

Gero eta paziente gehiago daude ZIUetan

Berria

Otsailaren 23tik COVID-19aren ondorioz ZIUetan dagoen paziente kopururik handiena erregistratu dute: 158 lagun. Beste 967 positibo atzeman dituzte Hegoaldean.

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.