Herrien Besarkada ekitaldia egingo dute Durangon maiatzaren 5ean

Euskal Herriko Eskubide Sozialen Gutunak eta Ongi Etorri Errefuxiatuak taldeak deituta, elkartasun besarkada erraldoia egingo dute Durangon maiatzean. Europako beste herri batzuetan ere aldi berean egingo dute ekintza, "neofaxismoa eta politika migratzaileak" salatzeko.

Ongi Etorri Errefuxiatuak plataformaren eta Eskubide Sozialen Kartak gaur goizean Bilbon egin duten agerraldiko irudia.
Ongi Etorri Errefuxiatuak plataformaren eta Eskubide Sozialen Kartak gaur goizean Bilbon egin duten agerraldiko irudia. Aritz Loiola/Foku

Uxue Gutierrez Lorenzo -

2019ko apirilak 17

Europak bizi duen garaiari erreferentzia eginez, maiatza "borrokaren ikur" bihurtu nahi dute. Herrien Besarkada kanpaina jarri dute martxan horretarako. Europako hamaika txokotan, Euskal Herria barne, elkartasun besarkada erraldoia egingo dute kontinenteak bizi duen "olatu neofaxista" salatzeko. Euskal Herriko deialdia aurkeztu dute Euskal Herriko Eskubide Sozialen Gutunak eta Ongi Etorri Errefuxiatuak plataformak. Durangon izango da, maiatzaren 5ean, 12:00etan. Herritarrei ekinaldian parte hartzera dei egin diete. Zortzi errenkadatan antolatuta, "herrien, pertsonen eta eskubideen arteko" besarkada egingo dute.

Bi norabide ditu egitasmoak, eta hala azaldu du Ana Perez bozeramaileak: "Batetik, baztertutako kolektiboen kontrako politika kriminalak salatu nahi ditugu, eta, bestetik, politika neoliberalei aurre egin eta pertsona guztientzako eskubideak defendatzeko konpromiso tinkoa adierazten dugu". Instituzioei leporatu diete krisi soziala eta ekonomikoa migratzaileen gain jartzen duen diskurtso "manipulatua" helarazi izana. Horrela eliteen erantzukizuna saihesten dutela azaldu du Perezek.

"Neofaxismoak politika migratzaileak baliatu nahi ditu botoak lortzeko", azaldu du Ongi Etorri Errefuxiatuak plataformako kide Nati Ovelleirok. Esan du Dublinen, Londresen, Berlinen eta Palermon (Italian) ere bat egin dutela kanpainarekin.

Euskal instituzioei eskaria

Euskal herriko instituzioak ere interpelatu nahi dituzte kanpainaren bidez: "Errefuxiatuen eskubideak modu eraginkorrean bermatuko dituzten baliabide guztiak ezarri behar dituzte euskal insitutzioek", adierazi du Perezek. Egoeraren aurrean politika sozialak bultzatzea inoiz baino beharrezkoagoa dela uste dute deitzaileek.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna