Dantza

Sei koreografo hartuko ditu Atalak 2.0. programaren aldi berriak

Egitasmoarekin "Akitania Berria-Euskadi-Nafarroa euroeskualdeko ehun koreografikoa" sustatu nahi dutela nabarmendu dute antolatzaileek. Aurten lehen aldiz, Dantzaz konpainiako dantzariak soilik ez, kanpokoak ere hartuko ditu programak.

Atalak 2.0. programaren aurkezpena, gaur goizean, Donostiako Tabakaleran.
Atalak 2.0. programaren aurkezpena, gaur goizean, Donostiako Tabakaleran. Jagoba Manterola / Foku

Itziar Ugarte Irizar -

2019ko apirilak 30

Ondorengo koreografoak izango dira Atalak 2.0. programa berrian egonaldia egingo dutenak: Myriam Perez Cazabon, Larrua proiektua eta Martxel Rodriguez, 2019an; eta Denis Santacana, Laida Aldaz eta Eneko Gil, hurrengo urtean. Bi asteko sorkuntza laborategi bana gidatuko du bakoitzak, 8-12 dantzari inguruko taldeak haren esku izanda.

Gaur goizean aurkeztu dute sormen koreografikoa sustatu nahi duen egitasmoaren edizio berria, Dantzaren Nazioarteko Egunaren biharamunean. Eta, hain justu, hori baliatu du Bertha Bermudez Atalak 2.0.-eko koordinatzaileak, "dantzaren profesionalizazioaren" alde egiteko. Azken emaitzan itsutu gabe, Atalak 2.0. programa "laborategi bat" dela azpimarratu du: "Helburua ez da egonalditik lan koreografiko bukatu batekin ateratzea, arakatzea baizik; elkarrizketa bat sortzea dantzariekin, eta ideiak trukatzea, bilaketan sakontzea".

Dantzaz konpainiak abiatu zuen programa, baina urterik urte bazkideak lotzen eta oinarria sendotzen joan da. Programaren sustatzaileak Gipuzkoako Dantzagunea, Donostia Kultura, Tabakalera Kultura Garaikideko Nazioarteko Zentroa, Azkuna Zentroa, Malandain Ballet Biarritz Zentro Koreografikoa, Nafarroako Baluarte Fundazioa eta Gasteizko Antzokien Sarea izan dira aurten; azken hau lehenbizikoz bat da programara.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna